Azərbaycan, Bakı, 1 avqust /Trend, müxbir T.Cəfərov/
İranda həbsdə olan ABŞ vətəndaşlarının vəkili ümid edir ki, məhkəmə hüquqlarını müdafiə etdiyi şəxslərin iki il müddətinə azadlıqdan məhrum edilməsi haqqında qərar verəcək, beləliklə də onlar artıq iki il həbsdə olduqları üçün sərbəst buraxılacaqlar. Bunu Trend-ə İranda həbsdə olan ABŞ vətəndaşlarının vəkili Məsud Şəfii (Masoud Shafiee) Trend-ə müsahibəsində bildirib.
İki il bundan əvvəl İran-İraq sərhədində Amerika vətəndaşları olan Şin Baver, Coşua Fetal və Sara Şord həbs ediliblər. Onlar İran sərhədini qanunsuz keçməkdə və casusluqda günahlandırılıblar. Lakin ABŞ bəyan edir ki, saxlanılanlar sərhədi təsadüfən keçən alpinistlər və səyyahlardır. Keçən il sentrabrın 14-də, İran Ramazan bayramı münasibətilə Sara Şordu 500 min dollarlıq vəsiqə zəmanəti ilə azadlığa buraxıb, lakin digər iki məhbus hələ də saxlanılır.
Şəfii həbsdə olan ABŞ vətəndaşlarının bəraət alması ilə bağlı məsələnin gündəmdə olmadığını deyib.
"ABŞ vətəndaşları artıq iki ildir ki, həbsdədirlər və onların hazırkı şəraitdə bəraət alması məsələsi gündəmdə deyil. Onların sərbəst buraxılması ilə bağlı qərarı məhkəmə verəcək və bunun baş tutacağına ümid edirik", - vəkil deyib.
O əlavə edib ki, qanuna əsasən, sonuncu məhkəmədən sonra bir həftə ərzində hakim öz qərarını açıqlamalıdır. Bu səbəbdən həbs olunmuş ABŞ vətəndaşları bu həftə azadlığa buraxıla bilərlər.
İranda həbsdə olan ABŞ vətəndaşlarının sonuncu məhkəməsi bazar günü keçirilib.
Bundan əvvəl İran Kəşfiyyat Xidmətinin rəisi Heydər Moslehi deyib ki, saxlanılan amerikalılar ABŞ həbsxanalarında olan İran vətəndaşları ilə dəyişdirilə bilərlər. Mayın sonlarında İran hakimiyyəti həbs olunan amerikalıların analarının öz övladları ilə görüşmələrinə imkan verib.