Azərbaycan, Bakı, 9 yanvar /Trend, müxbir S.Ağayeva/
Qazaxıstanda yanvarın 15-16-da növbədənkənar parlament seçkiləri günü bu ölkənin Azərbaycan ərazisində müvəqqəti yaşayan vətəndaşları Qazaxıstanın Bakıdakı səfirliyi yanında yaradılan seçki məntəqəsində səs verə biləcəklər. Bu barədə bazar ertəsi Trend-ə diplomatik missiyadan məlumat verilib.
Qazaxıstan Prezidenti Nursultan Nazarbayev noyabrda verdiyi fərmanla dördüncü çağırış parlament Məclisini buraxıb. Partiya siyahıları üzrə seçilən Məclis deputatlarının növbədənkənar seçkiləri 2012-ci il yanvarın 15-də, Qazaxıstanın Xalq Assambleyasına seçkilər isə yanvarın 16-da keçiriləcək.
Azərbaycan Respublikasının ərazisində yaşayan və ya olan Qazaxıstan vətəndaşları bu ölkənin Azərbaycandakı səfirliyindəki 140 saylı seçki məntəqəsində yerli vaxtla saat 09:00-dan 20:00-dək səs verə bilərlər. Səsvermədə iştirak üçün Qazaxıstan vətəndaşlığını təsdiqləyən sənədin olması vacibdir.
Diplomatik missiyadan deyiblər ki, hazırda Qazaxıstanın Azərbaycandakı səfirliyinin konsul uçotunda bu ölkənin 300-ə yaxın vətəndaşı var.
Ümumilikdə, Qazaxıstan MSK-nın xaricdə 56 seçki məntəqəsi yaradılıb.