Azərbaycan, Bakı, 11 dekabr /Trend/
Azərbaycanın xarici işlər naziri Elmar Məmmədyarov Rumıniya Respublikasının ölkəmizdəki səfiri Daniel Kristian Çiobanunu qəbul edib.
XİN-in mətbuat xidmətindən Trend-ə verilən məlumata görə, görüşdə nazir Elmar Məmmədyarov Rumıniya diplomatiyasının 150 illiyi ilə əlaqədar Rumıniya Xarici İşlər Nazirliyi tərəfindən təsis edilmiş Fəxri Fərmanla təltif edilib. Sözügedən Fəxri Fərman beynəlxalq münasibətlər sahəsində ümumdünya dəyərlərinin təşviqində göstərilən xidmətlərə görə verilir.
Həmçinin, görüşdə iki ölkə arasında mövcud münasibətlərin səviyyəsindən məmnunluq ifadə olunub və qarşılıqlı maraq kəsb edən digər məsələlər ətrafında fikir mübadiləsi aparılıb.
