Azərbaycan, Bakı, 13 dekabr /Trend/
Azərbaycanın BƏƏ-dəki səfirliyi tərəfindən Dubay Əmirliyində Azərbaycanın ümummilli lideri Heydər Əliyevin anım mərasimi keçirilib.
Səfirlikdən Trend-ə verilən məlumata görə, mərasimdə Azərbaycanın rabitə və informasiya texnologiyaları naziri Əli Abbasov, Azərbaycanın Dubay şəhərindəki baş konsulu və konsulluğun əməkdaşları, Azərbaycan Beynəlxalq Bankının Dubaydakı ofisinin nümayəndələri və Dubayda yaşayan həmvətənlərimiz iştirak edib.
Mərasimi səfir Elxan Qəhrəmanov çıxış nitqi ilə açaraq, ümummilli liderin həyatı haqqında geniş məlumat verib və Heydər Əliyevin 1993-cü ildə hakimiyyətə qayıdışından sonra apardığı müdrik siyasət nəticəsində dövlətimizin qısa müddət ərzində surətlə inkişaf etdiyini, Azərbaycanın dünya dövlətləri ilə müxtəlif sahələrdə əməkdaşlıq münasibətləri qurduğunu və bu siyasətin Heydər Əliyevin davamçısı İlham Əliyev tərəfindən uğurla davam etdirildiyini tədbir iştirakçılarının diqqətinə çatdırıb.
Sonra Heydər Əliyevin həyatı və siyasi uğurları haqqında filmə baxılıb.
Mərasimin sonunda anım süfrəsi açılıb.