Azərbaycan, Bakı, 6 sentyabr /Trend, müxbir S. Ağayeva/
"Pacific Alliance" birliyi GUAM-la əməkdaşlığa maraq göstərir. Bu barədə cümə günü Trend-ə GUAM-ın Baş katibi Valeri Çeçelaşvili deyib.
Onun sözlərinə görə, "Pacific Alliance" regional birliyi "GUAM - Demokratiya və İqtisadi İnkişaf Naminə Təşkilat"la əməkdaşlığa maraq göstərir.
"Bu təşkilat Sakit okean hövzəsinin beş iri ölkəsini - Meksika, Kolumbiya, Peru, Çili və Kosta-Rikanı birləşdirir".
Baş katib qeyd edib ki, hazırda birgə əməkdaşlığın imkanları öyrinilir: "GUAM və "Pacific Alliance"ın əməkdaşlığının əsası konkret layihələr, o cümlədən azad ticarət zonasıdır. Bu sahədə dialoq hər iki təşkilat üçün faydalı ola bilər".
V. Çeçelaşvili bildirib ki, Kolumbiyanın xarici işlər naziri bu yaxınlarda Bakıya səfəri çərçivəsində azərbaycanlı həmkarı Elmar Məmmədyarovla görüşdə əməkdaşlığın belə formatda olmasına marağını ifadə etmişdi. Bu, digər görüşlərdə də təsdiq edildi.
Baş katibin sözlərinə görə, GUAM və "Pacific Alliance"a üzv ölkələrin xarici işlər nazirləri səviyyəsində ilk görüş sentyabrın sonunda BMT Baş Assembleyası çərçivəsində keçiriləcək.
Hazırda tərəflər bu görüşə hazırlaşırlar.