Azərbaycan, Bakı, 1 oktyabr /Trend, müxbir T.Cəfərov/
İran parlamentinin 230 nümayəndəsi bəyanat yayaraq Prezident Həsən Ruhaninin Nyu-Yorkda Beynəlxalq Millətlər Təşkilatının (BMT) Baş Assambleyasında çıxışı zamanı sərgilədiyi mövqeni dəstəklədiklərini bildirib.
Trend-in YJC xəbər saytına (Young Journalists Club) istinadən verdiyi məlumata görə, İran parlamentinin nümayəndələri H.Ruhaninin BMT-dəki nitqini məntiqli və həlledici bir çıxış kimi dəyərləndirərək bildiriblər ki, bu çıxış və mövqe İslam İnqilabının dəyərlərinə uyğun bir mövqe idi: "Həsən Ruhani çıxışı zamanı İranı islami, sülhsevər, müzakirə tərəfdarı, regional və beynəlxalq problemlərin həlli üçün əməkdaşlıq edə biləcək bir ölkə kimi tanıtdı. Buna görə biz ona minnətdarıq".
Bəyanatda deyilir: "Ümid edirik ki, İrana qarşı sanksiyalar tətbiq etmiş ölkələr onu ləğv edəcək, İran xalqının hüquqlarını tanıyacaq və ona hörmətlə yanaşacaqlar".