Azərbaycan, Bakı, 9 oktyabr /Trend, müxbir A.Bədəlova/
Azərbaycanda prezident seçkiləri texniki cəhətdən kifayət qədər yaxşı təşkil edilib. Bu barədə Trend-ə açıqlamasında Avropa Parlamentindən olan müşahidəçilər missiyasının bolqarıstanlı üzvü Yevgeni Kirilov bildirib.
Azərbaycanda artıq ikinci dəfə prezident seçkilərini müşahidə edən Y.Kirilov deyiib: "Seçkilər texniki cəhətdən yaxşı təşkil edilib. Bütün mənalarda ötən seçkilərə nisbətən yaxşı təşkil edilib".
Onun sözlərinə görə, nümayəndə heyətinin üzviləri məcburi köçkünlərin səs verdikləri iki seçki məntəqəsində olublar: "Biz məcburi köçkünlərin səs verdikləri məntəqələri də görmək istəyirdik".
Səsvermə zamanı seçici fəallığı barədə danışan Y.Kirilov vurğulayıb ki, bu da kifayət qədər yüksək olub.
Onun sözlərinə görə, günortadan sonra seçki məntəqələrinin əksəriyyətində seçici fəallığı 50 faizdən yuxarı olub: "Biz gördük ki, günortadan sonra daha çox insan gəlir. Axşama kimi seçici fəallığı yaxşı göstəriciyə çatacaq".
Y.Kirilov bildirib: "Ümumilikdə deyə bilərəm ki, biz sakit şəkildə səsvermənin şahidi olduq. Heç bir gərginlik olmayıb".
Qeyd edək ki, bu gün Azərbaycanda prezident seçkiləri keçirilir. Seçki məntəqələri saat 08:00-da açılıb və 19:00-da bağlanacaq.
Prezident seçkisində 10 namizəd mübarizə aparacaq. Bunlar Yeni Azərbaycan Partiyasından (YAP) partiyanın sədri, Azərbaycan Prezidenti İlham Əliyev, Ümid Partiyasının sədri, deputat İqbal Ağazadə, öz təşəbbüsü ilə namizədliyini irəli sürmüş, deputat Zahid Oruc, Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Sosial Demokrat Partiyasının sədri Araz Əlizadə, Milli Dirçəliş Hərəkatı Partiyasının sədri, deputat Fərəc Quliyev, "Demokratik Qüvvələrin Milli Şurası" Seçicilərin Təşəbbüs Qrupu tərəfindən namizədliyi irəli sürülmüş Cəmil Həsənli, Ədalət Partiyasının sədri, deputat İlyas İsmayılov, Azərbaycan Demokrat Partiyasının sədri Sərdar Cəlaloğludur.
Azərbaycanın Mərkəzi Seçki Komissiyası tərəfindən 5 145 643 seçici qeydə alınıb.