Azərbaycan, Bakı, 3 dekabr /Trend, müxbir Elçin Mehdiyev/
"Ermənistan Livana sülhməramlılar göndərdi. 32 nəfərdən ibarət erməni sülhməramlıları İtaliya batalyonunda xidmət edəcəkdir. Yola salma mərasimində İtaliyanın Ermənistandakı səfiri C.Riçulli ilə birlikdə iştirak edən müdafiə naziri Seyran Ohanyan maraqlı və paradoksal açıqlama verdi. O, Livana erməni sülhməramlıları göndərilməsinin ümumi əsaslardan əlavə daha bir vacib səbəbinin olduğunu bildirdi. "Livan Kosovo, Əfqanıstan deyil. Livan Ermənistan respublikasının xarici təhlükəsizlik maraqları dairəsində olan Yaxın Şərqdir". Trend-in məlumatına görə, bu barədə Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu bu gün keçirdiyi mətbuat konfransında deyib.
Politoloqun fikrincə, E.Nalbandyanın bu açıqlaması savadsızlıq və siyasi savadsızlığın nümunəsi olmaqla yanaşı parlaq sofistika nümunəsidir: "İraqda erməni icması dağıldı. İraq erməniləri öz rəhbərləri, kilsə başçısı Avaq Asaduryanın əməlləri hesabına bu ölkəni tərk etməli oldular. ABŞ qoşunları İraqda idi. NATO İraq üçün koalisiya toplamışdı. Ermənistan İraqdakı erməni icmasını qorumaq üçün qüvvə göndərmək barədə düşünmədi də. Suriyada erməni icması Yaxın Şərqin erməni icmalarının bünövrə strukturudur. Dağılır. 100 minlik erməni icmasından 15-20 min qalır. Suriyada da müharibə gedir. Ermənistanın Suriya prezidenti B.Əsədlə xüsusi münasibəti var. Hətta erməni icmasını qorumaq üçün erməni qoşunlarını Suriyaya göndərməyi Bəşər Əsəddən xahiş etsəydi, siyasi və digər səbəblərdən B.Əsəd buna hökmən razılıq verəcəkdi. Kəsab hadisələri zamanı bəzi keçmiş erməni döyüşçülər Suriyaya erməniləri müdafiə etmək üçün döyüşə getmək istəyirdilər. Ermənistanın hüquq mühafizə orqanları onları Yerevan aeroportundan geri qaytardı".
M.Əhmədoğlu qeyd edib ki, Livanın paytaxtı Beyrutda erməni icması var. Amma indi baş verən proseslər erməni icmasının maraqlarına toxunmur:
"Əksinə erməni icması aktiv siyasi qızışdırıcılıqla məşğuldur. Livan parlamentinin erməni mənşəli 6 deputatından ikisi birmənalı "Hizbullah"ın mövqeyini müdafiə edir. 3 erməni deputat Xristian koalisiyasının üzvüdür. Biri isə gah Hizbullahçılara, gah da Xristian koalisiyasına tərəf reverans edir. Qərbin Livana sülhməramlı qüvvələrin göndərilməsinin yalnız bir adı var: "Hizbullah"ı sıradan çıxarmaq. "Hizbullah" İranın Livanda yaratdığı hərbiləşdirilmiş siyasi təşkilatdır. Yaxınlarda İran "Hizbullah"a raketlər də daxil olmaqla xeyli silah-sursat verdi. Böyük miqdarda maliyyə ayırdı. "Hizbullah"ın fəaliyyətinin qarşısını almaq üçün Avropa dövlətləri Səudiyyə Ərəbistanı ilə danışıq apardılar. Livan ordusunun güclənməsi üçün təxminən 4 milyard dollarlıq silah və maliyyə vəsaiti ayrılıb. Bunun 3 milyard dollarını Səudiyyə Ərəbistanı verəcəkdir. Fransa bu işin təşkilində aktiv rol oynayıb. Livan ordusuna hərbi təlimləri Fransa hərbçiləri keçəcəklər".
Politoloqun fikrincə, İran Livan ordusuna pul, silah-sursat, instruktor vəd versə də Livan rəhbərliyi bunu qəbul etmədi:
"Beləliklə, erməni sülhməramlıları İranın "Hizbullah" təşkilatına qarşı vuruşmaq məqsədilə Livana yola düşdü. 32 erməni hərbiçisi "Hizbullah"a qarşı döyüş əməliyyatında ab-havanı müəyyənləşdirməyəcək. Amma vacib olan Ermənistanın İrana qarşı çıxmaq siyasi iradəsidir. Ermənistan Qərbə sübut etmək istəyir ki, o hətta İrana qarşı çıxa bilər. Təki NATO Ermənistanı dəstəkləsin. İranın Ermənistandakı səfiri M.Rəisi yaxınlarda narahatlıq bildirdmişdi. Onun bu narahatlığının dolayısı yolla həm də Ermənistanın NATO ilə hərbi əlaqələrinə aid olduğunu başa düşmək olar".
Politoloq qeyd edib ki, paradoksal vəziyyətdir: "Ermənistanın dörd qonşusu var. Azərbaycana və Türkiyəyə qarşı Ermənistanın düşmənçilik siyasəti bəllidir. Qalan iki qonşusuna da Ermənistan sağlam münasibət göstərmir. RF prezidenti V.Putin gürcü-abxaz dəmiryolunun açılması ideyasını gündəliyə gətirməklə bu prosesə ciddi dəstək verdi. Abxaziyanı razı salmağı öz üstünə götürən V.Putin Gürcüstanı razı salmağı Ermənistanın boynuna qoydu. Ermənistan V.Putinin ideyasına uyğun Gürcüstana təzyiq etməlidir. Hər halda Gürcüstan haçansa Ermənistana cavab verə bilər. Qərbin sözü ilə isə Ermənistan digər qonşusu İranın maraqlarının əleyhinə gedir".