Bakı. Trend:
Əziz Azərbaycanın Müstəqillik Gününü ən səmimi hisslərimlə təbrik edirəm.
Trend xəbər verir ki, bunu Türkiyənin xarici İşlər naziri Hakan Fidan rəsmi "X" hesabındakı paylaşımında deyib.
"Şanlı Azərbaycan bayrağının vətənin hər qarışında sərbəst dalğalandığı bu mübarək gündə müstəqillik uğrunda canlarını verən bütün şəhidlərimizi rəhmət və ehtiramla yad edirəm", - paylaşımda vurğulanıb.
Qeyd edək ki, bu gün Azərbaycanda 28 May – Müstəqillik Günü qeyd edilir.
1917-ci ildə Rusiyada baş vermiş inqilab nəticəsində Romanovlar sülaləsinə son qoyuldu. Nəticədə Rus İmperiyası dağıldı. Xalqlar öz müqəddəratlarını özləri həll etməli oldular. Bu imkandan istifadə edərək 1918-ci il mayın 28-də Azərbaycanın milli qayəli, milli təfəkkürlü övladları Azərbaycan Xalq Cümhuriyyətini elan etdilər.
Azərbaycan Xalq Cümhuriyyəti təkcə Azərbaycanda deyil, bütün Şərqdə ilk demokratik respublika idi. Bu, respublika parlamentli dövlət idi. Onun dövlət atributları - bayrağı, himni, gerbi qəbul edildi. Üçrəngli bayraqda türkçülük, islamçılıq və avropalaşmaq bir vəhdətdə idi. Ancaq Azərbaycan Xalq Cümhuriyyəti cəmi 23 ay yaşaya bildi. 1920-ci il aprelin 28-də bolşeviklərin 11-ci ordusu Azərbaycanı işğal etdi və respublika süquta uğradı.