Avqustun 31-də Azərbaycan Respublikası Ali Məhkəməsində hakim Zeyqəm Hüseynovun sədrliyi ilə silahlı birləşmələr yaratmaqda və başqa cinayət əməllərində təqsirləndirilərək müxlətif müddətlərə məhkum edilmiş 13 nəfərin kassasiya şikayətinə baxılıb.
Trend məlumat verir ki, nəticədə həmin məhkumlardan 1 nəfər - Ruslan Əliyev azadlığa buraxılıb. Rüstəm Əsgərovun cəzası 6 ay, Müşfiq Qurbanovun cəzası 2 il, digər müttəhimlərin isə cəzası 1 il müddətinə azaldılıb. Məhkumlardan iki nəfərin - Xızır Marqaşvili və Vüsal İsayevin isə şikayətinə baxılmayıb.
Qarabağ Azadlıq Təşkilatının (QAT) sədri və Partizanların Hüquqlarını Müdafiə Komitəsinin üzvü Akif Nağı məhkəmənin çıxardığı qərara münasibət bildirib. QAT sədri Ali Məhkəmənin qərarını ədalətsiz hesab etdiyini söyləyib. "Biz hesab edirik ki, Ali Məhkəmə yenə də partizanların işinə ədalətsiz mövqedən yanaşdı.
Hakim məhkumların aldıqları cəzanın törədilmiş hadisəyə uyğun omladığını, onların hərəkətlərinin motivini və digər amilləri nəzərə almadı. QAT Ali Məhkəmənin ədalətsiz mövqeyini pisləyir və növbəti instansiyada düzgün qərarın çıxarılması üçün bütün vasitələrdən, o cümlədən, etiraz aksiyalarından istifadə edəcək" - deyə QAT sədri bildirib.
