Oktyabrın 28-də Kişinyovda Qara Dəniz İqtisadi Əməkdaşlıq Təşkilatının Xarici İşlər Nazirləri Şurasının XII iclası keçiriləcək. Bu barədə Trend ə Azərbaycanın Xarici İşlər Nazirliyindən bildirilib.
İclasda təşkilatın perspektivlərinin müzakirəyə çıxarılacağı planlaşdırılır. Əsas diqqət Aİ, GUAM kimi beynəlxalq təşkilatlarla əməkdaşlığın inkişafı, həmçinin, energetika və nəqliyyat məsələlərinə ayrılacaq.
İclasa hazırlıq məsələləri və danışıqların ilkin gündəliyi, o cümlədən, Azərbaycanın təşkilatda rolunun artması məsələsi xarici işlər naziri Elmar Məmmədyarovun bu yaxınlarda təşkilatın baş katibi Tedo Caparidze ilə görüşü zamanı müzakirə olunub. Azərbaycan energetika və nəqliyyat məsələləri üzrə əməkdaşlığa böyük diqqət ayırmaq niyyətindədir.
"İclasda Azərbaycanı E.Məmmədyarov təmsil edəcək", - deyə nazirlikdə bildirilib.