"Müsavat Partiyası təkrar seçkilərdə iştirak etməklə bağlı qərar qəbul edərsə, bu partiyanın "Azadlıq" blokunda fəaliyyəti sual altında qalacaq". Bu barədə adıçəkilən blokda təmsil olunan Azərbaycan Demokrat Partiyası (ADP) sədrinin müavini Həsrət Rüstəmov bildirib.
H.Rüstəmov qeyd edib ki, "Azadlıq" blokunun təkrar seçkilərlə bağlı vahid qərarı olmadığından bu məsələyə yenidən baxılacaq: "Müsavat Partiyası təkrar seçkilərə qatılmaqla bağlı qərar qəbul edərsə bu blokda müzakirə olunacaq". ADP rəsmisi onu da bildirib ki, blokda təmsil olan AXCP ilə ADP təkrar seçkilərdə iştirak etməməklə bağlı qərar qəbul edibsə Müsavatın onlarla bir yerdə fəaliyyət göstərəcəyi sual altındadır: "Çünki bu məsələdə fərqli mövqe nümayiş etdirənlər bir yerdə ola bilməzlər".
"Azadlıq" blokunda təmsil olunan digər partiya Azərbaycan Xalq Cəbhəsi Partiyası (islahatçılar) sədrinin müavini Nurəddin Məmmədli də Müsavat Partiyasının bu məsələ ilə bağlı qəbul edəcəyi müsbət qərarla razılaşmayacaqlarını qeyd edib: "Əgər belə bir qərar olarsa mütləq müzakirəyə çıxarılacaq. Güman edirəm ki, bu qərardan sonra Müsavatın AXCP və ADP ilə bir yerdə olacağına inanmaq çətindir".