Bakıda ucaldılan bəzi abidələr yeniləri ilə əvəzlənməlidir. Trend xəbər verir ki, bu barədə Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev bildirib.
Q.Həsənquliyev qeyd edib ki, Əzizbəyov, Çaparidze və Ayna Sultanovanın heykəllərinin yeniləri ilə əvəzlənməsi məsələsinə baxmaq lazımdır: "Brüsseldə olarkən Ümümdünya Gömrük Təşkilatının qarşısında qoyulan Dədə Qorqud abidəsini ziyarət etmişəm. Amma Bakıda Dədə Qorqudun abidəsinin olmaması bizə qürur gətirmir. Bakıda Ənvər Paşaya abidə ucaltmaq lazımdır. Bu, Türkiyə-Azərbaycan dostluğunun rəmzinə çevrilə bilər".
Millət vəkili onu da vurğulayıb ki, hər il Cənubi Azərbaycanda yaşayan soydaşlarımız Bəzz qalasına yürüş edirlər: "Təklif edirəm ki, ya Azadlıq meydanında, ya da Çaparidzenin heykəlinin yerində Babəkə abidə ucaldılsın. Bu abidə də 50 milyonluq azərbaycanlıların ziyarət edə biləcəyi ünvan ola bilər".
