Azərbaycan Respublikasının xarici işlər naziri Elmar Məmmədyarov İqtisadi Əməkdaşlıq Təşkilatının baş katibi Asxat Orazbayın rəhbərlik etdiyi nümayəndə heyətini qəbul edib. Bu barədə Trend Azərbaycan XİN-nin mətbuat xidmətinə istinadən xəbər verir.
Nümayəndə heyəti İƏT ölkələrinin rəhbərləri və hökumət başçılarının 9-cu zirvə toplantısı və təşkilatın xarici işlər nazirlərinin 16-cı görüşünün təşkili üçün göstərilən köməkliyə görə nazirə öz təşəkkürünü bildirib.
İƏT-ın zirvə toplantısının gündəliyinin artıq hazır olduğunu bildirən A.Orazbay digər sənədlərin də yekunlaşmaq üzrə olduğunu qeyd edib.
Elmar Məmmədyarov belə yüksək səviyyəli tədbirlərin keçirilməsinin ölkəmiz üçün mühüm önəm daşıdığını qeyd edib.