Son bir həftədə Kürdə suyun səviyyəsi 30-35 sm düşsə də, Salyanda 100-lərlə evin həyəti qrunt suları içərisində qalmaqdadır. Hətta onlarla çökək həyətlərdə su evlərin içərisinə də dolub. Havaların istiləşməsi isə, həyətlərə dolmuş çirkab sularda həşaratların və qurbağaların artmasına, ətrafa dözülməz qoxu yayılmasına səbəb olub.
Yaranmış vəziyyətə dözməyib artıq yaşadığı evləri tərk edənlər də var. Təbii fəlakətdən zərər çəkənlərin əsas narazılığı isə qrunt sularını axıtmaq üçün rayon fövqaladə hallar komissiyasının onlara elektrik nasosları ayırmamasındandır.
Respublika fövqaladə hallar komissiyası 2003-cü il daşqınları zamanı rayona bu məqsədlə 80 eleketrik nasosu versə də, hazırda bunlardan yalnız 17-dən istifadə edilir. Salyan gigiyena epidemioloji mərkəzin baş həkimi Mirəddin Ağayev bildirir ki, həyətlərdəki çirkaba çevrilmiş qrunt suları çəkilməmiş dezinfeksiya işləri aparmaq olmaz, çünki dezinfeksiyaedici maddələr toz halındadır, suya qarışan kimi öz effektini itirir və həm də zəhərlənmələrə səbəb ola bilər.
Ən çox ziyan isə çiy kərpicdən tikilmiş evlərin sakinlərinə dəyib. Su içərisində qalan çiy kərpiç əridiyindən, Salyanda 100-ə yaxın ev qəza vəziyyətinə düşüb. Ənvər Qasımzadə küçəsi 28-də yerləşən Oqtay Salayevə məxsus 5 otaqlı ev isə uçduğundan, ailəsi qonşuluqda gecələyir, uçqun nəticəsində 5 yaşlı nəvəsi də yüngül xəsarət alıb. Vəziyyətin ağırlığını nəzərə alan respublika fövqaladə hallar nazirliyi dünən Salyana 20 nəfərdən ibarət xilasedici dəstə göndərib. Xilasedicilərin istifadəsində 2 KAMAZ markalı yük maşını, 2 SMP nasosu və yardımicı avadanlıqlar var. Dəstənin komandiri Rauf Əhmədovun dediyinə görə, Kür daşqınlarının əhaliyə vurduğu ziyan lokal xarakter daşıdığından nasoslar fasilələrlə işləyir. Yəni suyun həmin əraziyə yenidən dolmasını gözləyirlər. Komandir onu da dedi ki, elə bir ciddi təhlükə yoxdur, ən çox su yığılmış həyətlərdəki qrunt sularını uzağı 10 günə çəkib Kürə axıdacaqlar.