Gəncə şəhərində müvəqqəti məskunlaşmış məcburi köçkünlərin yaşadığı 28 binada təmir-bərpa işləri aparılır. Bu barədə məlumatı Trend ə Azərbaycan Qaçqın və Məcburi Köçkünlərlə iş üzrə Komitənin Gəncə şəhəri üzrə məsləhətçisi Süleyman Abbasov verib.
Onun sözlərinə görə, "Məcburi köçkünlərin sosial inkişafı" proqramına uyğun olaraq Gəncə Texnologiya Universitetinin və Gil Torpaq Kombinatının nəzdindəki yataqxanaların, Hacıkənd qəsəbəsindəki orta məktəbin dam örtüklərinin, su və kanalizasiya sistemlərinin, qaz və elektrik xətlərinin yenidən qurulmasına və təmir olunmasına artıq başlanılıb.
"Qaçqınkom" nümayəndəsi həmçinin qeyd etdi ki, qaçqın və məcburi köçkünlərə qış aylarında onlara yardım şəklində ayrılan neftin əvəzinə bundan sonra pul ödəniləcək: "Dövlət Neft Fondundan hər bir ailəyə ayırlan 40 litr neftin əvəzində onun 5 aylıq pul ekvivalenti çörək pulu ilə birlikdə bankomat kartlarına köçürüləcək".
S.Abbasov hesab edir ki, bu prosesi hər bin köçkün rayonunun yerlərdəki səlahiyyətli nümayəndələri həyata keçirəcək.
