Naxçıvanda Kredit Bank Olmayan Kredit Təşkilatı MMC təsis edilib. Trend in Naxçıvan Bürosunun məlumatına görə bununla bağlı təqdimat mərasimi keçirilib.
Qeyd edək ki, Naxçıvan MR hökuməti, BMT-nin İnkişaf proqramı və Beynəlxalq Miqrasiya Təşkilatının 1998-ci ildən regionda birgə həyata keçirdiyi "Birliklərin yaradılması və mikrokredit layihəsi"nin müddəti bitdiyindən onun təşkilatlanması və hüquqi fəaliyyətinin yenidən tənzimlənməsinə yenidən baxılaraq Naxçıvan MR Regional Məsləhət Mərkəzinə təhvil verilib və bu mərkəzdə Naxçıvan-Kredit Bank Olmayan Kredit Təşkilatı MMC təsis edilib.
Tədbirdə bir sıra rəsmi şəxslər, o cümlədən BMT İnkişaf proqramının Azərbaycan ofisinin mətbuat və ictimaiyyətlə əlaqələr şöbəsinin müdiri Fərqan Abbaszadə, Beynəlxalq Miqrasiya Təşkilatının Azərbaycan Nümayəndəliyinin rəhbəri Sarat Daş iştirak edib.
Tədbirin sonunda "Birliklərin yaradılması və mikro kredit layihəsi" haqqında sənədli film nümayiş olunub, layihə əsasında müştərilərin istehsal etdikləri məhsulların sərgisinə baxış keçirilib.