Azərbaycan Xalq Cəbhəsi Partiyası (AXCP) Xəqani 33 ünvanından çıxarılan zaman partiyaya dəyən ziyanı hesablayır və araşdırma başa çatandan sonra dəymiş ziyanla bağlı məhkəməyə müraciət olunacaq. Bu barədə Trend ə müxalifətyönlü AXCP sədrinin müavini Həsən Kərimov bildirib.
Onun sözlərinə görə, partiyaya dəyən ziyanı hesablamaq üçün işçi qrup yaradılıb. H.Kərimov qeyd edib ki, bu işi həyata keçirməkdə bir sıra çətinliklər var. "Çünki partiya nümayəndələrini Keşlədə yerləşən və AXCP-nin əmlakı saxlanılan binaya buraxmırlar. Orada keşik çəkən polislər bildirirlər ki, bizə göstəriş verilib ki, binaya heç kimi buraxmayın."
AXCP rəsmisi əlavə edib ki, problemin həlli üçün Bakı şəhər Baş Polis İdarəsinin rəhbərliyi ilə görüşmək istəsələr də bu baş tutmayıb.
O vurğulayıb ki, partiya qərargah üçün yer axtarışını davam etdirir.
Xatırladaq ki, noyabrın 24-də AXCP uzun müddət yerləşdiyi və Xəqani 33 ünvanında yerləşən "Azadlıq" qəzetinə məxsus binadan çıxarılıb. AXCP hazırda müttəfiqi olan Azərbaycan Demokrat Partiyasının qərərgahında fəaliyyət göstərir.
Qeyd edək ki, müxalifəti təmsil edən AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000-ci ilə qədər sədri Azərbaycanın eks-prezidenti mərhum Əbülfəz Elçibəy olub. 2000-ci ildən indiyədək AXCP-yə keçmiş dövlət katibi, sabiq deputat Əli Kərimli sədrlik edir.