"Bəzi ADP funksionerlərinin hakimiyyətlə əməkdaşlıq edilməsi barədə fikirləri "Azadlıq" blokunun mövqeyi deyil". Bu sözləri Trend ə açıqlamasında "Azadlıq" blokunun həmsədri, Vətəndaş və İnkişaf Partiyasının rəhbəri Əli Əliyev bildirib.
O bildirib ki, "Azadlıq" blokunun Sədrlər Şurasının bu gün - yanvarın 16-da keçirilən toplantasında ADP daxilindəki vəziyyət, bu partiyanın bəzi funksionerlərinin bəyanatları, həmçinin blok liderlərinin ünvanına səslənən tənqidlər müzakirə olunub. Əli Əliyev ADP sədrinin birinci müavini Sərdar Cəlaloğlunun hakimiyyətlə əməkdaşlığa hazır olduğunu deməsi ilə bağlı öz mövqeyini bildirib: "Sərdar Cəlaloğlu hakimiyyətlə əməkdaşlıq deyəndə milli məsələlərlə bağlı siyasi dialoqu nəzərdə tutur. Bu dialoq isə hər bir halda zəruridir. Lakin mübarizə apardığın qüvvə ilə əməkdalıq mümkün deyil. ADP-nin digər funksionerlərinin bəyanatları isə bu partiyanın və "Azadlıq" blokunun mövqeyini ifadə etmir. Bu, onların şəxsi fikirləridir"-deyə Ə.Əliyev vurğulayıb.
Qeyd edək ki, "Azadlıq" blokunda 4 müxalifət partiyası- Azərbaycan Xalq Cəbhəsi (AXCP), Liberal, Vətəndaş və İnkişaf (VİP), Azərbaycan Demokrat (ADP) partiyaları təmsil olunur.
