Azərbaycan, Bakı / Trend müxbir S.İlhamqızı/ Bəzi siyasətçilərin müxalifəti siyasi səhnədən getməyə çağırması müxalifəti parçalamaq cəhdidir. Bu barədə Azərbaycan İslam Demokrat Partiyasının (AİDP) sədri Tahir Abbaslı açıqlama verib.
Müxalifəti təmsil edən millət vəkili Pənah Hüseyn bildirib ki, müxalif düşərgənin 50 faizi siyasi səhnədən getməlidir. Deputat hesab edir ki, Azərbaycan siyasətinə fayda verməyənlər, siyasətdən baş çıxarmayanlar səhnədən tamam getməli, bu sahədə fəaliyyət göstərməməlidirlər.
Abbaslı Pənah Hüseynin fikirlərinə etiraz edərək bunu gündəmdə qalmaq cəhdi kimi qiymətləndirir: "Əslində siyasi səhnədən Pənah Hüseyn özü getməlidir. O, partiya yaratsa da onu inkişaf etdirə bilməyib, nəhayət, bu işdən əl çəkib. Pənah Hüseyn deputat seçilməsini də uğur saymamalıdır. Azərbaycan müxalifətinin problemləri çoxdur və bu düşərgə onsuz da kifayət qədər parçalanıb. Amma bu problemlər "kimlərsə getməlidir" şüarı ilə həll edilən deyil" - deyə partiya sədri qeyd edib.
ADİP müxalifətyönlü, islam təmayüllü partiyadır.