Azərbaycan, Bakı / Trend müxbir İ.Əlizadə/ Azərbaycanda "İlkin səhiyyə xidməti haqqında" qanunun qəbul olunmasına ehtiyac var. Bu barədə Milli Məclisin Sosial siyasət daimi komissiyasının sədr müavini, millət vəkili Musa Quliyev bildirib.
Onun sözlərinə görə, "İlkin səhiyyə xidməti haqqında" qanun layihəsi üzərində Səhiyyə Nazirliyi və bəzi qeyri-hökumət təşkilatları ilə birgə iş aparılır.
Quliyev qeyd edib ki, "QİÇS-ə qarşı mübarizə haqqında" qanun layihəsinin də qəbul olunmasına ehtiyac var: "QİÇS virusunun törətdiyi xəstəliklərin qarşısının alınması haqqında" qanun 1996-cı ildə qəbul edilib. Ötən 11 il ərzində dünyada bu problemə münasibət dəyişib, yeni mübarizə üsulları yaranıb. Ona görə də qanuna yeni formada baxmaq lazımdır. Komissiya düşünür ki, bu məsələnin üzərində də işləsin".
