Azərbaycan, Bakı, 7 yanvar /müx. TrendLife Günel Əhmədova/
Gürcü qızı Manananın toy mərasiminə bir gün qalıb. Toyun bütün tədarükü görülüb, qonaqların bir qismi artıq Bakıdadır. Müğənninin TrendLife-a bildirdiyinə görə, bir neçə saat əvvəl avstriyalı dostu Albert Koleri qarşılayıb. Bəstəkar otellərin birində qalır və onun səfəri bir neçə gün davam edəcək. Musiqiçinin səfərinin eyni zamanda yaradıcılıq xarakteri daşıdığını diqqətə çatdıran müğənni bunun danışıqlardan ibarət olacağını söylədi. Onun Gürcüstan, Türkiyə və Rusiyadan gələn qonaqları isə axşam saatlarında qarşılanacaq. Hava şəraitinin qonaqların səfərinə mane olmayacağını diqqətə çatdıran müğənni onlarla telefon əlaqəsi yaratdıqdan sonra buna əmin olduğunu diqqətə çatdırdı.
Ssenariləşdirilmiş toy mərasimindən danışan müğənni dedi ki, burada həm azəri, həm də gürcü adət-ənənələrindən istifadə ediləcək. Müğənninin ideyasına görə, "Sarı gəlin" restoranının birinci mərtəbəsində milli musiqilərimiz səsləndiriləcək və rəqslər ifa olunacaq. İkinci mərtəbədə isə, gürcü xoru məharətini göstərəcək. Gəlinlə bəyin zala daxil olduğu ərəfələrdə Azərbaycanın "Vağzalı"sı səsləndiriləcək və milli musiqiləri ifa olunacaq. Toyun davamında yeril və xarici estrada ulduzlarının iştirakı ilə maraqlı proqram təqdim ediləcək. Lakin Manananın nigahı sabah kəsilməyəcək.
Müğənni nigah masasına Azərbaycan vətəndaşı kimi oturacağı barədə xəbər vermişdi. Lakin Miqrasiya İdarəsi sənədləşdirmə prosesini davam etdirdiyi üçün, nəticələri barədə yaxın günlərdə məlumat veriləcək. Bunu nəzərə alan gürcü qızı nigah mərasimini hələlik təxirə salıb. O, sənədləşdirmə işi başa çatdıqdan sonra nigahını Azərbaycan vətəndaşı kimi bağlayacağını qeyd edib.
Bu həftənin sonu isə o, həyat yoldaşı Georgi ilə birgə Gürcüstana səfər edəcək. Xatırladaq ki, toyun ikinci hissəsi yanvarın 26-da Gürcüstanda davam etdiriləcək. Müğənni bal ayını xarici ölkələrdən birində keçirmək üçün müvafiq məkan seçəcək. Onlar Bakıya fevralda qayıdacaqlar.