Azərbaycan, Bakı, 10 yanvar / Trend , müxbir K.Zərbalıyeva/ Notariat fəaliyyəti ilə peşəkarcasına məşğul olmaq üçün şəhadətnamə almaq istəyən namizədlərlə müsahibə yanvarın 16-da başlayacaq.
Ədliyyə Nazirliyinin Notariat İdarəsindən cümə axşamı Trend ə bildirilib ki, müsahibədə test imtahanında müvəffəqiyyət qazanmış 22 namizəd iştirak edəcək.
Ötən ilin mayında Ədliyyə Nazirliyində notariat fəaliyyəti ilə peşəkarcasına məşğul olmaq istəyən şəxslərin sənədlərinin qəbulu keçirilib.
Sənəd vermiş 500-ə yaxın namizədlə noyabrda test imtahanı keçirilib və 22 namizəd ikinci mərhələyə buraxılıb.
İdarədən bildirilib ki, müsahibədən sonra namizədlər Ədliyyə Nazirliyinin müəyyən etdiyi notariusun yanında 6 ay müddətində təcrübə keçəcək. Təcrübənin yekunu olaraq namizədlər şəhadətnamə almaq üçün notariat fəaliyyəti üzrə peşə hazırlığına dair müsahibədən keçəcəklər.
İdarədən bildirilib ki, hazırda fəaliyyət göstərən notariuslar da peşə hazırlığına dair müsahibəyə cəlb olunacaq. Müsahibənin sonunda vakant notarius yerlərinin dəqiq sayı müəyyənləşdiriləcək. İdarədən hesab edirlər ki, hazırda notarius işləyənlərin müəyyən qisminin müsahibədən keçməyəcəyi ehtimalı var.
Müsahibədən keçən namizədlərdən bir neçəsinə özəl notarius kimi işləmək üçün lisenziya veriləcək. Özəl notariat institutu Azərbaycan üçün yeni olduğundan ilkin mərhələdə özəl notariusların sayı da məhdud olacaq. Son nəticədə isə respublikada özəl notariatlar dövlət notariatları ilə müqayisədə üstünlük təşkil edəcək.
Respublikda 149 notarius ştatı mövcuddur. Aparılacaq islahatlar nəticəsində onların sayı 158-ə çatdırılacaq.
Bir neçə notarius 65 yaşına çatdığı üçün təqaüdə göndərilib.
Dövlət və ya xüsusi notarius kimi işləmək istəyən Azərbaycan vətəndaşı ali hüquq təhsilli olmalı, müvafiq mənəvi keyfiyyətlərə və peşə biliklərinə malik olmalıdır
