Azərbaycan, Gəncə, 05 fevral / Trend , müxbir V.Məmmədov/ Gəncə şəhərində dəm qazından zəhərlənmələr artıb. Gəncə şəhər Təcili Tibbi Yardım Xəstaxanasının baş həkimi Namiq Nəbiyev çərşənbə axşamı Trend ə bildirib ki, yanvar ayında havaların soyuq və şaxtalı keçməsi ilə əlaqədar əhalinin müxtəlif tipli sobalardan geniş istifadə etməsi dəm qazından zəhərlənmələri artırıb.
Yanvar ayında Azərbaycanda dəm qazından ölənlərin sayı 30-u ötüb.
Baş həkim deyib ki, yanvarda dəm qazından zəhərlənmə diaqnozu ilə 8 xəstə müalicə olunub. Fevralın ilk günlərində isə 4 zərərçəkənə tibbi yardım göstərilib. Nəbiyev bildirib ki, dəm qazından zəhərlənmə hallarının artması ən çox İran İslam Respublikasında istehsal olunan sobaların istifadəsi ilə bağlıdır.
Həmçinin istehlak sertifikatı olmayan, quraşdırılmasında qüsura yol verilən avadanlıqlar, eləcə də məişətdə kustar üsulla qızdırıcı vasitələrin (odun, kömür və s) istifadəsi bu halların yaranmasına səbəb olur.
Gəncə şəhər Qaz İstismarı İdarəsindən isə deyiblər ki, şəhər əhalisinin istehlak etdiyi qazın tərkibi bütün laborator müayinələrdən keçməklə, tam keyfiyyətli şəkildə istehlaka verilir.
