Azərbaycan, Bakı, 01 aprel / Trend , müxbir K.Zərbalıyeva/ "Zeytun Bağları" Kəndli Fermer Təsərrüfatı Birliyinin rəhbəri həbs olunub.
Respublika Prokurorluğundan bildirilib ki, Birliyin rəhbəri Natiq Allahverdiyevə qarşı Cinayət Məcəlləsinin sənədlərin saxtalaşdırılması maddəsi ilə (320-ci maddə) cinayət işi başlanılıb.
Allahverdiyevin əməllərində torpaqlara zərər vurma cinayətinin olub-olmadığının araşdırıldığı bildirilib. Respublika Prokurorluğu Ekologiya və Təbii Sərvətlər Nazirliyi ilə birlikdə bu faktı araşdırır.
"Azadlıq" qəzetinin əməkdaşı Aqil Xəlilin "Zeytun bağları" ərazisində üzləşdiyi insidentdə ona fiziki güc tətbiq etmiş adamlardan biri kimi Allahverdiyevin qardaşı Dağbəyi Allahverdiyevin adı hallanır.
Xəlilə qarşı törədilən cinayət faktı ilə bağlı Baş Prokurorluğun Ağır Cinayətlərə Dair İşlər üzrə İstintaq İdarəsində cinayət işi açılıb. Faktla bağlı hələlik saxlanılan yoxdur.
Məqalənin müəllifi ilə [email protected] ünvanı ilə əlaqə saxlaya bilərsiniz