Azərbaycan, Bakı, 25 iyun /TrendLife müx. Günel Əhmədova
Bakı Musiqi Akademiyasında təhsil almaq istəyən tələbələrin sayı artıb. Bu barədə TrendLife-a BMA-nın prorektoru Yeganə Axundova məlumat verib. O, bildirib ki, bu say ötən illərlə müqasiyədə 4 dəfə çoxalıb. Prorektorun əlavəsinə görə, xarici vətəndaşların tələbatı daha çox vokal və fortepiano fakültəsindədir: "Bu o deməkdir ki, bizdə təhsil həqiqətən də güclüdür və göstərici bizi sevindirir".
Söhbəti zamanı Bakı Musiqi Akademiyasında aparılan təmir işlərindən söz salan Yeganə xanım bildirdi ki, yeni dərs ilini tələbələr yenicə təmirdən çıxmış binada keçirəcəklər. Hazırda isə intensiv təmir işləri davam etdirilir. Yeganə Axundova xüsusi ilə vurğuladı ki, hər il sentyabrın 18-də keçirilən Musiqi Günü bu il həm də Bakı Musiqi Akademiyasının açılışı ilə yadda qalacaq. Üzeyir Hacıbəyovun doğum gününə təsadüf edən bayram təqvimi xüsusi proqramla qeyd olunacaq.