Azərbaycan, Bakı, 20 fevral / Trend , müxbir R.Ergün/ Çimərlik futbolu üzrə Azərbaycan klubu Çempionlar Liqasında iştirak edə bilər.
"Bu ildən etibarən, çimərlik futbolu klubları arasında Çempionlar Liqası təşkil olunacaq. Bu dəfə Çempionlar Liqasında iştirak etmək imkanımız yoxdur. Amma növbəti yarışda biz də iştirak edə bilərik", - AFFA-nın saytına açıqlamasında çimərlik futbolu üzrə Azərbaycan yığmasının baş məşqçisi Emil Cabbarov deyib.
Cabbarov yığma komandanın baş məşqçisi vəzifəsinə bir neçə gün əvvəl təyin olunub. Ondan əvvəl yığma komandanın baş məşqçisi braziliyalı Enrike Qustavo Silva olub.
Cabbarov Azərbaycan yığmasından əvvəl Rusiyanın "Delta" klubunun baş məşqçisi olub.
Baş məşqçi bildirib ki, ona Azərbaycan yığması ilə yanaşı, Rusiya millisində məşqçi işləmək təklifi də olunub.
"Mən həmin təklifi qəbul etmədim. Azərbaycan yığmasından təklif gələn kimi razılaşdım", - deyə Cabbarov əlavə edib.
Hazırda Azərbaycanda çimərlik futbolu üzrə çempionat həvəskar klublar arasında keçirilir.
Cabbarov bildirib ki, o, ölkə çempionatının peşəkar klublar arasında keçirilməsi üçün əlindən gələni edəcək.
Məqalə müəllifi ilə əlaqə ünvanı:[email protected]