Azərbaycan, Şəki, 24 fevral / Trend , müxbir X.Əkbərova/
Azərbaycanın şimal-qərbində yerləşən Şəki rayonu (paytaxt bakıdan 352 kilometr məsafədə) ərazisində bir neçə görkəmli şəxslərin heykəl və büstləri qoyulacaq, çərşənbə axşamı Trend -a rayon İcra Hakimiyyətinin şöbə müdiri Rəfail Məcidov məlumat verib.
Onun sözlərinə görə, rayonun görkəmli yerlərində ucaldılacaq tarixi şəxsiyyətlərin heykəl və büstlərinin qoyulması üçün yerlər artıq müəyyənləşdirilib.
Şəkinin mərkəzi mədəniyyət və istirahət parkında Azərbaycanın gülüş ustası Lütvəli Abdullayevin, tarix-memarlıq qoruğu adlanan ərazidə "Qala divarları" qarşısında Şəki xanı olan Cələbi xanın at üstündə heykəli qoyulacaq.
Bundan başqa, "Xan sarayl"nın yaxınlığında sarayı inşa etdirmiş Hüseyn xan Müştaqın heykəli ucaldılacaq.
Azərbaycanın əlyazma sənətinin inkişafında xidmətləri olan Salman Mümtazın büstünün isə rayonun mərkəzi yerlərindən birində qoyulması planlaşdırılıb.
Artıq Cələbi xan, Hüseyn xan Müştaqın və Salman Mümtazın büstü hazırdır. Bir neçə gün əvvəl isə rayon İcra Hakimiyyəti tərəfindən Fətəli xan Xoyskinin büstünün hazırlanması sifariş olunub. Fətəlixan Xoyskinin büstünün isə rayonda onun adını daşıyan küçədə qoyulması planlaşdırılıb.
Məqalə müəllifi ilə əlaqə ünvanı: [email protected]