Azərbaycan, Bakı, 26 noyabr / Trend , müxbir A.Hüseynbala/
Azərbaycan Prezidenti yanında QHT-lərə Dövlət Dəstəyi Şurası dekabrın əvvəlində növbəti maliyyə müsabiqəsini elan edəcək.
"Müsabiqənin şərtlərində xeyli dəyişiklik və yenilik olacaq, müsabiqənin dövriliyi də dəyişəcək", - cümə axşamı Trend -a Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev bildirib.
Trend -un arayışı: Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasına 2009-cu ildə 569 layihə təqdim edilib. Layihə təqdim edən QHT-lərin Şuradan istədiyi məbləğ ümümilikdə 9 milyon manata yaxın olub, amma Şuranın müsabiqə fondu bundan dəfələrlə az - 2 milyon 68 manat təşkil edib. Müsabiqəyə təqdim edilən layihələrdən 226-sı Şura tərəfindən dəstəklənib və onlara ümumilikdə 1 milyon 848 min manat vəsait ayrılacaq.
Quliyevin sözlərinə görə, əvvəlki illərdən fərqli olaraq müsabiqə ildə bir neçə dəfə keçiriləcək.
"Bizim beynəlxalq tərəfdaşlarımızla həyata keçirdiyimiz birgə layihələrin sayı və həcmi artacaq", - Şura sədri əlavə edib.
Onun fikrincə, müsabiqə üçün elan olunan mövzularla da bağlı müəyyən ümumiləşmələr olacaq. "Prioritet hesab etdiyimiz mövzulara daha çox üstünlük veriləcək. 2010-cu ildə parlament seçkiləri keçiriləcək, eyni zamanda, Azərbaycan Prezidenti İlham Əliyev 2010-ci ili ekologiya ili elan etdiyindən bununla bağlı mövzular daha önə çəkiləcək", - Quliyev vurğulayıb.
2009-cu ildə müsabiqədə qalib gələn QHT-lərin layihələri necə yerinə yetirmələri ilə bağlı aparılan monitorinqə gəldikdə, Şura sədri nəticələrin gələn ilin yanvar ayında açıqlanacağını deyib.
Məqalə müəllifi ilə əlaqə ünvanı: [email protected]