...

Azərbaycanda erkən nikahlar əhalidə mövcud yanlış stereotiplərlə bağlıdır - komitə sədri

Cəmiyyət Materials 14 May 2010 12:59 (UTC +04:00)
Azərbaycanda erkən nikahlar əhalidə mövcud yanlış stereotiplərlə bağlıdır. Trend-in məlumatına görə, bunu Ailə, Qadın və Uşaq Problemləri Üzrə Dövlət Komitəsinin sədri Hicran Hüseynova hakim Yeni Azərbaycan Partiyasının internet-saytına verdiyi müsahibədə bildirib.
Azərbaycanda erkən nikahlar əhalidə mövcud yanlış stereotiplərlə bağlıdır - komitə sədri

Trend-i buradan izləyin

Azərbaycan, Bakı, 14 may /Trend, müxbir K.Zərbalıyeva/

Azərbaycanda erkən nikahlar əhalidə mövcud yanlış stereotiplərlə bağlıdır. Trend-in məlumatına görə, bunu Ailə, Qadın və Uşaq Problemləri Üzrə Dövlət Komitəsinin sədri Hicran Hüseynova hakim Yeni Azərbaycan Partiyasının internet-saytına verdiyi müsahibədə bildirib.

"Onlar öz övladlarının həyatını, xoşbəxtliyini qurmaq istədikləri halda, tamam əks, mürəkkəb bir vəziyyətlə üzləşirlər. Çünki 16-17 yaşlarında uşaq nə psixoloji, nə də fizioloji cəhətdən ailə qurmağa hazır olmur", - komitə sədri deyib.

Hüseynova bir neçə il öncə komitə tərəfindən bu problemin monitorinqinin keçirildiyini, araşdırmalar aparıldığını bildirib. Bunun nəticəsində ümumiləşdirilmələr aparılaraq, konkret fəaliyyət planı işlənib.

Komitə sədri bildirib ki, əhali arasında geniş maarifləndirmə proqramları aparılır.

Hüseynovanın sözlərinə görə, komitə erkən nikah probleminin həlli ilə bağlı tədbirlər paketi ilə çıxış edib. Buraya nikah müqaviləsinin bağlanması da daxildir. Komitə sədri deyir ki, Azərbaycan şəraitində bu praktikanın həyata keçirilməsi üçün daha geniş maarifləndirmə tədbirləri keçirilməlidir.

"Çox hallarda ailə münaqişələri və boşanmalar qadınların iqtisadi baxımdan hüquqlarının pozulmasına gətirib çıxarır. Nikah müqaviləsinin tətbiq olunması uşaq və qadınların hüquqlarının müdafiəsini gücləndirə bilər", - Hüseynova vurğulayıb.

Komitə nikaha daxil olan şəxslərin tibbi arayış təqdim etmək təklifi ilə də çıxış edib. Onun sözlərinə görə, bunun məqsədi müəyyən genetik, xroniki xəstəliklərin qarşısını almaq, sağlam nəslin dünyaya gəlməsini dəstəkləməkdir.

"Bu, gənc ailələrin qarşılaşa biləcəkləri problemlərin öncədən qarşısını almaqdır. İndi bu təklif müzakirələr mərhələsindədir; ümid edirik, cəmiyyətdə təklifimiz anlaşıqlıqla qarşılanacaq", - komitə sədri bildirib.

Hüseynova qanunvericiliyində qadınların hüquqlarının qorunması, ölkələrarası övladlığa götürmə, erkən nikahla mübarizə və s. sahələrdə müəyyən təkmilləşməyə ehtiyac olduğunu deyir.

Onun sözlərinə görə, erkən nikah hallarının qarşısının alınması üçün qanunvericilikdə həmin halın baş verməsinə dair məsuliyyətin kim tərəfindən daşınması və eyni zamanda, qanunvericilikdə əks olunan nikah yaşı məsələləri tənzimlənməlidir.

"Erkən nikah hallarının sayının Azərbaycanda azalması tendensiyası müşahidə olunur. Bununla bağlı Ailə Məcəlləsinin 10-cu maddəsində əks olunan nikah yaşına düzəliş edilməli və həmin maddəni pozan insan məsuliyyətə cəlb olunmalıdır. Bu, əsasən, Azərbaycanda demoqrafiya problemlərinin bundan sonra da uğurla həll olunmasına gətirəcək", - Hüseynova deyib.

Komitə sədri hazırda Azərbaycanda iki milyona yaxın ailə yaşadığını bildirib.

Xəbər lenti

Xəbər lenti