Azərbaycan, Bakı, 1 sentyabr /Trend, müxbir H.Bağırov/
Azərbaycanda ağır cinayətlər törədən hərbi qulluqçular məhkəmə qərarından kasasiya şikayəti veriblər.
Trend-in məlumatına görə, Şirvan Apelyasiya Məhkəməsində Müdafiə Nazirliyinin Füzuli rayonunda yerləşən N saylı hərbi hissəsinin tağım komandirini və onun müavinini qətlə yetirməkdə və digər əməllərdə təqsirləndirilən əsgərlər - Yusif Oqtay oğlu Yusifov, Emin Sahib oğlu Rəhimov, Toğrul Qulu oğlu Bağırovun apelyasiya şikayəti üzrə ilkin məhkəmə iclası keçirilib.
Prosesdə təqsirləndirilən şəxslərin vəkilləri apelyasiya şikayətinə məhkəmə istintaqının aparılması ilə baxılması barədə vəsatət qaldırıblar.
Məhkəmə müdafiə tərəfinin vəsatətini təmin etməyib. Müdafiə tərəfinin məhkəmənin qərarından Ali Məhkəməyə kasasiya şikayəti verməsi ilə bağlı məhkəmə qeyri-müəyyən vaxtadək təxirə salınıb.
Ağır Cinayətlərə dair İşlər üzrə Məhkəmənin hökmü ilə Bağırov və Rəhimov ömürlük, Yusifov isə 15 il müddətinə azadlıqdan məhrum ediliblər.
Təqsdirləndirilənlər qabaqcadan əlbir olub döyüş şəraitində yerləşən tağımın dayaq məntəqəsində əsgərlərə qarşı əvvəllər törətdikləri qeyri-əxlaqi zorakılıq hərəkətləri faktı üzrə ilkin araşdırmanı aparan tağımın komandiri, leytenant Elşən Şəmil oğlu Tağıyevi və tağım komandirinin müavini, gizir Ramal Vəlihəd oğlu Əmrahovdan qisas almaq məqsədi ilə öldürmək qərarına gəliblər.
Onlar 2009-cu il iyulun 18-də Rəhimov dəyişdirici olduğu vaxt silah-sursat otağını açaraq oradan avtomat silahları götürüb onları döyüş vəziyyətinə gətirərək tağımın həyətinə çıxıblar.
Bundan sonra Bağırov gizir Əmrahovu öldürmək məqsədi ilə tağımın qazanxanasına gedib, Yusifovla Rəhimov isə leytenant Tağıyevi zabitlər otağında qətlə yetiriblər.
Təqsirləndirilən şəxslər bundan başqa hərbi hissənin ərazisində 20-dən çox əsgərə hədə-qorxu gələrək, onları zorlayıblar.
