Azərbaycan, Bakı, 11 iyul /Trend, müxbir T.Hacıyev/
Azərbaycanda müxtəlif ictimai təşkilatların birgə yaratdıqları Avro-Atlantik Şuranın təşkilat komitəsi yaradılıb. Trend-in məlumatına görə, Azərbaycan-Atlantika Əməkdaşlıq Assosiasiyasının sədri, Müsavat Partiyası Məclisinin sabiq sədri Sülhəddin Əkbər təşkilat komitəsinin sədri seçilib.
Azərbaycan Təhlükəsizlik və Müdafiə İctimai Assosiasiyasının sədri Yaşar Cəfərli təşkilat komitəsinin sədr müavini, Doktrina JHAM-ın nümayəndəsi Cəsur Sümərənli isə təşkilat komitəsinin ictimaiyyətlə əlaqələr üzrə nümayəndəsi seçilib.
Tədbirdə qeyd olunub ki, Avro-Atlantik Şuranın yaradılmasında başlıca məqsəd Azərbaycanın demokratikləşməsini və Avro-Atlantik məkana inteqrasiya etməsini istəyən təşkilatların fəaliyyətini koordinasiya etməkdir.
"Azərbaycanın demokratikləşməsi və Avro-Atlantik məkana inteqrasiya proseslərinə ictimai dəstəyin təşkili məqsədilə bir qrup qeyri-hökumət təşkilatları, tanınmış politoloqlar, hərbi ekspertlər, sabiq siyasi partiya funksionerləri, jurnalistlər və digər ictimaiyyət nümayəndələri "Avro-Atlantik Şura" təsis etməyə qərar verdilər. Biz ölkədaxili və xarici prosesləri təhlil edərək qərara aldıq ki, Azərbaycanın Avro-Atlantik inteqrasiyasını dəstəkləyən qüvvələr bir araya gəlsin və mövcud proseslərə ictimai dəstəyin formalaşdırılmasına dəstək verilsin", - Sülhəddin Əkbər bildirib.
Onun sözlərinə görə, bölgələrdə də şuranın nümayəndəliklərinin yaradılması qarşıya məqsəd qoyulub.
Əkbər onu da bildirib ki, şurada 27 təşkilat birləşəcək.