Azərbaycan, Bakı, 5 mart / Trend müxbir İ.İsabalayeva/
Azərbaycanda yaz-yay gursulu dövrünün axım proqnozunu hazırlamaq məqsədilə qar ehtiyatları üzərində müşahidə-qiymətləndirmə işlərinin həyata keçirilməsi üçün Ekologiya və Təbii Sərvətlər Nazirliyinin Milli Hidrometeorologiya Departamentinin Çöl Tədqiqat Ekspedisiya Qrupu Böyük və Kiçik Qafqaz dağlarında ekspedisiyaya başlayıb. Nazirliyin mətbuat xidmətindən bazar ertəsi Trend-ə verilən məlumata görə, ekspedisiya 20 gün davam edəcək.
Kiçik Qafqazın Gədəbəy, Göy-göl, Daşkəsən, Böyuk Qafqazın Balakən, Zaqatala, Oğuz, Qəbələ, Quba, Qusar rayonlarının və Naxçıvan MR-nın çay hövzələrində 28 marşrut üzrə xüsusi proqrama əsasən qarölçmə işləri aparılacaq.
Qarölçmə işlərinin nəticələrinə əsasən yuxarı çay hövzələrində formalaşan qar-su ehtiyatları qiymətləndiriləcək. Bundan gursululuq dövrunün axım proqnozunun tərtibində istifadə olunacaq.