Azərbaycan, Bakı, 9 mart / Trend müxbir K.Zərbalıyeva/
Ədliyyə orqanlarında qulluğa qəbul olunmuş hüquqşünaslar Ədliyyə Akademiyasında təlim keçəcəklər.
Ədliyyə Nazirliyinin mətbuat xidmətindən Trend-ə verilən məlumata görə, ədliyyə orqanlarına qulluğa qəbulla bağlı ötən ilin noyabrında keçirilmiş test imtahanında uğur qazanmış namizədlərlə Nazirliyin Müsabiqə Komissiyası tərəfindən fərdi qaydada söhbət aparılıb.
Müsabiqəyə yekun vurularaq nəticələrə görə müvəffəqiyyət qazanmış 59 nəfər növbəti mərhələyə buraxılıb.
Həmin namizədlərin qanunvericiliyin tələblərinə müvafiq olaraq peşə fəaliyyətinə buraxılması məqsədilə Ədliyyə Akademiyasında icbari təliminin keçirilməsinə bu ilin mart ayının 12-dən başlanılacaq.