...

Əlillərin tibbi-sosial reabilitasiyası sistemi təkmilləşdirilir (FOTO)

Cəmiyyət Materials 21 Yanvar 2013 13:43
Yanvarın 21-də Əmək və Əhalinin Sosial Müdafiəsi Nazirliyinin maliyyə dəstəyi ilə «Sosial Xidmətlər Təşəbbüsü» İctimai Birliyi tərəfindən həyata keçirilən «Əlillərin tibbi-sosial reabilitasiyası sisteminin təkmilləşdirilməsi» layihəsinin təqdimatı olub.
Əlillərin tibbi-sosial reabilitasiyası sistemi təkmilləşdirilir (FOTO)

Trend-i buradan izləyin

Azərbaycan, Bakı, 21 yanvar /Trend/

Yanvarın 21-də Əmək və Əhalinin Sosial Müdafiəsi Nazirliyinin maliyyə dəstəyi ilə "Sosial Xidmətlər Təşəbbüsü" İctimai Birliyi tərəfindən həyata keçirilən "Əlillərin tibbi-sosial reabilitasiyası sisteminin təkmilləşdirilməsi" layihəsinin təqdimatı olub.

Nazirliyin İctimaiyyətlə əlaqələr şöbəsindən Trend-ə verilən məlumata görə, tədbir həmin layihə çərçivəsində və Beynəlxalq Əmək Təşkilatının (BƏT) dəstəyi ilə tərtib edilmiş "Əlillərin bərpa mərkəzlərində cari vəziyyətin təhlilinə dair hesabat"ın müzakirəsinə həsr edilib.

Tədbirdə Nazirliyin Əlillərin sosial müdafiəsi siyasəti şöbəsinin müdiri Vüqar Həsənov və nazirliyin müvafiq struktur bölmələrinin əməkdaşları, "Sosial Xidmətlər Təşəbbüsü" İctimai Birliyinin sədri Ramiz Behbudov, Nazirlik yanında İctimai Şuranın, Azərbaycan Həmkarlar İttifaqları Konfederasiyasının, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının, BƏT-in, UNİCEF-in, digər yerli və beynəlxalq təşkilatların nümayəndələri iştirak edib.

Hesabatın əsas məqamları onun müəllifi, Avropa Reabilitasiya Platformasının mütəxəssisi Donal MkAnaney tərəfindən təqdim edildikdən sonra tədbir müzakirələr və sual-cavab sessiyası ilə davam edib. Tədbirin sonunda əlillərin bərpa mərkəzlərinin işinin təkmilləşdirilməsi və qabaqcıl beynəlxalq təcrübəyə uyğun qurulması üçün Nazirliyin və tərəfdaş təşkilatların 2013-cü ildə yeni proqramlar icra etməsinin vacibliyi vurğulanıb.

Onu da bildirək ki, "Əlillərin tibbi-sosial reabilitasiya sisteminin təkmilləşdirilməsi" layihəsi çərçivəsində 22-23 yanvar 2013-cü il tarixlərində nazirliyin tabeliyində olan əlillərin bərpa mərkəzlərinin rəhbər işçiləri üçün seminar keçiriləcək.

Seminarın əsas məqsədi qeyd olunan layihə çərçivəsində tərtib edilmiş "Əlillərin bərpa mərkəzlərində cari vəziyyətin təhlilinə dari hesabat" haqqında mərkəz direktorlarını ətraflı məlumatlandırmaq, hesabatda əksini tapmış məqamlara dair diskussiya aparmaq və yeni strateji plan hazırlamaqdır. BƏT-in də dəstəyi ilə təşkil ediləcək seminar Avropa Reabilitasiya Platformasının mütəxəssisi Donal MkAnaney tərəfindən aparılacaq.

Seminarda əlillərin bərpa mərkəzlərindəki vəziyyət geniş müzakirə ediləcək, mərkəz direktorları müxtəlif işçi qruplarında işə cəld edilərək ümumi strategiya ətrafında müzakirələr aparılacaqdır. Seminarın nəticəsi kimi əlillərin reabilitasiyası sistemində islahatların aparılması üçün real vəziyyətə əsaslanan strategiya sənədinin layihəsi hazırlanacaq.

Məqalədə:
Xəbər lenti

Xəbər lenti