Bakı. Trend:
Rusiyalı gimnastlar Nikita Fedorenko və Dmitri Uşakov Bakıda batut gimnastikası üzrə Dünya Kubokunda sinxron çıxışlarda qızıl medal qazanıblar.
Rusiyalı gimnastlar finalda 49,900 bal toplayıblar.
Belaruslu duet Vladislav Qonçarov və Mixail Kozak 49,800 balla ikinci, portuqaliyalı duet isə 48,600 balla üçüncü olublar.
Azərbaycan gimnastları Dmitri Fedorovski və Ruslan Ağamirov 47,400 balla finalda dördüncü mövqedə qərarlaşıblar.
Bakıda batut gimnastikası üzrə Dünya Kuboku Milli Gimnastika Arenasında keçirilir.
Olimpiya ilinin batut gimnastikası üzrə ilk yarış mövsümünün açılışını edən Kubokda Avropa ilə yanaşı, Yaponiya, Avstraliya, eləcə də ABŞ-ı təmsil edən idmançılar iştirak edir.
Ümumilikdə, yarışlarda 17 ölkədən 77 gimnast (46 kişi və 31 qadın) fərdi və sinxron çıxış proqramında mübarizə aparır.
Yarışlar zamanı tamaşaçılar da diqqətdən kənarda qalmayacaq. Onlar müxtəlif maraqlı müsabiqələrdə iştirak edə və təşkilatçılardan mükafatlar ala biləcəklər.