...

Peşə məktəblərində təlimlər yekunlaşdı

Cəmiyyət Materials 12 Mart 2016 11:17 (UTC +04:00)
Azercell Telekom MMC-nin British Council ilə birgə həyata keçirdikləri peşə təhsili sahəsində “İş Dünyası üçün Bacarıqlar” layihəsi çərçivəsində müəllimlər üçün nəzərdə tutulan təlimlər sona çatıb.
Peşə məktəblərində təlimlər yekunlaşdı

Bakı. Trend:

Azercell Telekom MMC-nin British Council ilə birgə həyata keçirdikləri peşə təhsili sahəsində "İş Dünyası üçün Bacarıqlar" layihəsi çərçivəsində müəllimlər üçün nəzərdə tutulan təlimlər sona çatıb.

Azercell Telekom MMC-dən Trend-ə verilən məlumata görə, ötən ilin dekabrından başlayan layihə çərçivəsində keçirilən təlimlərdə Bakıda yerləşən ilk-peşə ixtisas təhsili müəssisələrində IKT və Telekommunikasiya üzrə fəaliyyət göstərən 36 müəllim iştirak edib. Həmin təlimlərdən seçilən 16 müəllim isə Böyük Britaniyadan dəvət olunan ekspert Kemal Ahson tərəfindən keçirilən təlimlərə qatılıblar. Təlim zamanı müəllimlər peşə təhsili üzrə yeni və effektiv tədris metodları, şagirdlərin məşğulluq qabiliyyətlərinin artırılması üçün düzgün şəkildə yönləndirilməsi, işəgötürənlərin peşə təhsilinin tədrisində rolunun vacibliyi, əldə edilən bilik və bacarıqların mübadiləsinə dair biliklər əldə ediblər.

Layihə çərçivəsində şagirdlər üçün təlimlər də nəzərdə tutulub. Təlimlərin əsas məqsədi şagirdlərin məşğulluq imkanlarının artırılmasıdır. Təlimlərə Bakıda yerləşən ilk-peşə təhsili müəssisələrində İKT və Telekommunikasiya istiqaməti üzrə təhsil alan 120 şagird cəlb edilib. Təlimlər zamanı şagirdlər iqtisadiyyat və biznes üzrə baza biliklər əldə edərək, karyerada uğur qazanmağın, müvəffəqiyyət əldə etməyin yolları, ünsiyyət, əməkdaşlıq, problemlərin həlli və s. kimi iş həyatında lazım olan şəxsi və peşəkar bacarıqlara yiyələniblər. Təlimləri uğurla başa vuran şagirdlər Azercell Telekom MMC-nin dəstəyilə istehsalat təcrübəsi keçmək imkanı əldə edəcəklər.

Məlumat üçün bildirək ki, Azercell Telekom öz fəaliyyəti boyunca daim gənclərin inkişafına yönələn layihələr həyata keçirib. Şirkətin elan etdiyi Tələbə Proqramı çərçivəsində Azərbaycanın ali təhsil müəssisələrində təhsil alan qabiliyyətli gənclərimiz Azercell şirkətindən xüsusi təqaüd və şirkətin müxtəlif şöbələrində təcrübə keçmək imkanı qazanırlar. Eyni zamanda, Azercell-in həyata keçirildiyi sosial layihələrin böyük bir qismi də təhsillə bağlıdır. Həmçinin, Azercell aparıcı universitetlərlə əməkdaşlıq edir, onların maddi-texniki bazasının gücləndirilməsinə yardım göstərir. Məhz Azercell şirkətinin təşəbbüsü və dəstəyi ilə Qafqaz Universitetində ilk dəfə olaraq 4G laboratoriyası quraşdırılıb. Təhsilə və gənclərə yardım etmək bundan sonra da Azercell şirkətinin prioritet fəaliyyət sahələrindən biri olacaq.

Məqalədə:
Xəbər lenti

Xəbər lenti