...

"Yazmağı-oxumağı bacarmayanlar haqqında məlumatlar TQDK buraxılış imtahanları keçirəndə üzə çıxıb"

Cəmiyyət Materials 1 İyul 2016 16:51 (UTC +04:00)
Tələbə Qəbulu üzrə Dövlət Komissiyasından Trend-ə verilən məlumata görə, Azərbaycan Respublikasının Dövlət İmtahan Mərkəzi (DİM) Direktorlar Şurasının növbəti iclası keçirilib.
"Yazmağı-oxumağı bacarmayanlar haqqında məlumatlar TQDK buraxılış imtahanları keçirəndə üzə çıxıb"

Bakı. İlhamə İsabalayeva - Trend:

Azərbaycan Respublikasının Dövlət İmtahan Mərkəzi (DİM) Direktorlar Şurasının növbəti iclası keçirilib. İclasda sədr Məleykə Abbaszadə, sədrin müavinləri Namiq Babayev, Bəhram Xəlilov, Şuranın üzvləri Ceyhun Bayramov, Niyazi Hacıyev və Fariz İsmayılzadə iştirak ediblər (Şuranın üzvü Kamil Aydazadə xarici ezamiyyətdə olduğuna görə iclasda iştirak etməyib).

Tələbə Qəbulu üzrə Dövlət Komissiyasından Trend-ə verilən məlumata görə, iclas zamanı TQDK-nın və Dövlət Qulluğu məsələləri üzrə Dövlət Komissiyasının (DQMK) həyata keçirdiyi işlər barədə hesabatlar dinlənilib, fikir mübadiləsi aparılıb və qarşıda duran vəzifələr müzakirə edilib.

Direktorlar Şurasının sədri Məleykə Abbaszadə keçirilmiş imtahanlar barədə məlumat verərək, ali təhsil müəssisələrinin magistratura səviyyəsinə aparılmış müsabiqənin ilkin nəticələrini təqdim edib. Qeyd olunub ki, ötənilki nəticələrə əsaslanaraq TQDK Azərbaycan və rus bölmələri üzrə birgə müsabiqə aparılmasını təklif etsə də, bəzi ali təhsil müəssisələrinin planında müsabiqənin ayrı aparılması göstərilib. TQDK öz təklifini onunla əsaslandırıb ki, Azərbaycan və rus bölmələrinin kontingentlərinin saylarında kəskin fərq olduğuna görə, müsabiqə ayrı aparıldıqda keçid balları arasında da kəskin fərq yaranır.

Təhsil nazirinin müavini C.Bayramov vurğulayıb ki, ali təhsil müəssisələri bu kimi məsələlərin həllində sərbəstdirlər, müsabiqənin birgə aparılması tədrisin təşkilində çətinliklərin yaranmasına (rus bölməsində qrupların komplektləşdirilməməsinə) səbəb olduğundan, onlar müsabiqənin ayrı aparılmasına üstünlük verirlər. Müzakirələr nəticəsində qərara alınıb ki, növbəti il plan tərtib olunarkən birgə təhlillər aparılsın.

M.Abbaszadənin məruzəsində toxunduğu növbəti məsələ ali və orta ixtisas təhsili müəssisələrinin qabiliyyət komissiyaları üzrə qeydiyyatdan keçənlərin sayı ilə bağlı olub. Belə ki, qeydiyyatların sayının çox olması qabiliyyət imtahanlarını keçirən ali təhsil müəssisələrinin, xüsusilə Rəssamlıq Akademiyasının rəhbərliyinin ciddi narazılığına səbəb olub. Lakin üç istiqamət üzrə aparılmış buraxılış imtahanlarından sonra müsabiqə şərtlərini ödəyərək qabiliyyət imtahanlarına buraxılanların sayı xeyli azalıb. Dördüncü istiqamət və əvvəlki illərin məzunları üçün keçiriləcək imtahanlardan sonra da bu rəqəm bir qədər azalacaq. Odur ki, ötən ilki təcrübəni nəzərə alan və abituriyentlərin sərbəst seçiminə imkan yaradan TQDK bildirir ki, qabiliyyət imtahanlarının keçirilməsi ilə bağlı heç bir narahatlığa səbəb yoxdur.

Sədr üç istiqamət üzrə aparılmış buraxılış imtahanlarının ilkin nəticələrini təqdim edərək, ötən illə müqayisədə nəticələri yaxşılaşmış rayonları xüsusi vurğulayıb.

Təhsil nazirinin müavini C.Bayramov öz növbəsində qeyd edib ki, Nazirliyin həyata keçirdiyi layihə çərçivəsində nəticələri zəif olan bir neçə rayonda xüsusi tədbirlər görülüb, şagirdlər əlavə məşğələlərə cəlb olunublar. İclas iştirakçıları belə qənaətə gəlibər ki, yalnız səylər birləşdirildikdə müsbət nəticələr əldə etmək mümkündür. Belə ki, bir tərəfdən TQDK tərəfindən buraxılış imtahanlarının nəticələri əsasında kolleclərə və V qrup üzrə ali məktəblərə qəbul olmaq imkanının yaradılması, digər tərəfdən Təhsil Nazirliyinin həyata keçirdiyi tədbirlərin sayəsində buraxılış imtahanlarının nəticələrinin yaxşılaşması müşahidə olunur.

Bununla yanaşı, sədr buraxılış imtahanlarında imtahan protokollarına əsasən yazma-oxuma bacarığı olmayan şagirdlər haqqında məlumatı da təqdim edərək göstərib ki, bütün aidiyyəti qurumlar əlindən gələni etməlidirlər ki, müstəqil Azərbaycanda hazırkı dövrdə belə hallara rast gəlinməsin: "Təəssüf ki, bu hallar barədə 2012-ci ilədək heç vaxt məsələ qaldırılmayıb, onlar ilk dəfə TQDK tərəfindən buraxılış imtahanları keçirilməyə başladıqda üzə çıxıb."

C.Bayramov qeyd etdi ki, rəsmi statistikaya əsasən Azərbaycanda savadlılıq 99.8% təşkil edir, yəni əhalinin 0.2 faizi savadsızdır. Bu, dünya üzrə ən yaxşı göstəricilərdən biridir. Qlobal yanaşmada belə şagirdlərin mövcudluğu o qədər də böyük problem deyil. Bununla yanaşı, nazirlik müvafiq təhsil şöbələrinə gələcəkdə belə hallara rast gəlinməməsi üçün həmin şagirdlərlə xüsusi məşğul olmağı tapşırıb.

Müzakirə olunan hər bir məsələyə dair müzakirələr aparılıb, iclas iştirakçılarının fikir və təklifləri dinlənilib.

Məqalədə:
Xəbər lenti

Xəbər lenti