...

Fərdi uçot sistemində 146 329 nəfər şəxs qeydiyyata alınıb

Cəmiyyət Materials 15 Sentyabr 2017 14:16 (UTC +04:00)
Cari ilin yanvar-avqust aylarında fərdi uçot sistemində əlavə olaraq 146 329 nəfər şəxs qeydiyyata alınıb.
Fərdi uçot sistemində 146 329 nəfər şəxs qeydiyyata alınıb

Bakı. Trend:

Cari ilin yanvar-avqust aylarında fərdi uçot sistemində əlavə olaraq 146 329 nəfər şəxs qeydiyyata alınıb. Sistemdə fərdi şəxsi hesabı olanların sayı 3 milyon 520 min nəfərə yaxındır.

Bu barədə Trend-ə Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə əlaqələr şöbəsindən məlumat verilib.

Cari ilin yanvar-avqust aylarında ƏƏSMN yanında Dövlət Sosial Müdafiə Fondunun fərdi uçot sistemində əlavə olaraq 146 329 nəfərə fərdi şəxsi hesab açılıb. Bu da ötən ilin müvafiq dövrü (128 964 nəfər) ilə müqayisədə 13,5 faiz çoxdur.

1 sentyabr 2017-ci il tarixə sistemdə qeydiyyata alınan sığortaolunanların sayı ötən ilin müvafiq dövrü (3 309 118 nəfər) ilə müqayisədə 6,4 faiz artaraq 3 milyon 519 min 886 nəfərə çatıb.

Azərbaycanın sığorta-pensiya sisteminin vacib elementi olan fərdi uçot sistemi 2006-cı ildən fəaliyyət göstərir. İşləyən vətəndaşların fərdi uçot sistemi ilə əhatə olunması, sistemdə fərdi şəxsi hesaba malik olmaları onların əmək pensiyası hüquqlarının formalaşması üçün əsas rolunu oynayır.

ƏƏSMN tərəfindən sosial sığorta münasibətlərinin də elektron infrstruktur üzərində qurularaq şəffaflaşdırılması təmin edilib. “Məcburi dövlət sosial sığorta vəsaitlərinin onlayn ödənilməsi”, “Sığortaedənin (Fiziki şəxs) onlayn uçota alınması”, “Sığortaedənin (Hüquqi şəxs) onlayn uçota alınması”, “Sığortaedənin uçot nömrəsinin öyrənilməsi”, “Dövlət sosial sığorta şəhadətnaməsinin dəyişdirilməsi və ya dublikatının verilməsi üçün müraciətin qəbulu” və s. e-xidmətlər vasitəsilə vətəndaşlar sosial sığorta münasibətləri üzrə bütün xidmətlərdən real vaxt rejimində, rahat və şəffaf şəraitdə istifadə edirlər.

Bununla yanaşı, nazirliyin “Sığortaolunanlara məlumatların verilməsi” e-xidməti də əhalinin istifadəsindədir ki, bu e-xidmət hər bir işləyən vətəndaşa fərdi şəxsi hesabında toplanan pensiya kapitalı barədə istənilən vaxt məlumat öyrənməyə imkan verir.

Məqalədə:
Xəbər lenti

Xəbər lenti