Bakı. Trend:
Azərbaycanda xüsusi karantin dövründə əməkdaşları məhdud sayda işə cəlb edilməli olan dövlət əhəmiyyətli obyektlərin, habelə fasiləsiz fəaliyyət göstərən müəssisələrin siyahısında Gəncə Avtomobil Zavodu İstehsalat Birliyi də var. Hazırda zavod tam kollektivlə olmasa da, ehtiyac olduğu qədər işçilərin fəaliyyəti nəticəsində işini davam etdirir.
Bu barədə Trend-ə açıqlamasında Gəncə avtomobil zavodu İB Müşahidə Şurasının sədri Xanlar Fətiyev deyib.
Onun sözlərinə görə, bu gün karantin rejiminin qaydalarına uyğun olaraq yığım xətlərində iş gedir.
“Bildiyiniz kimi, müəssisəmiz Azərbaycanda kənd təsərrüfatı texnikalarının istehsalı ilə məşğul olan yeganə zavoddur. Ölkəmizdə kənd təsərrüfatı sahəsində çalışan fermerlər və iş adamlarının texnikalara olan tələbatını ödəmək məqsədilə kollektiv bütün qaydalara əməl etmək şərtilə işini davam etdirir. Konveyerdə xətlər üzrə məsafə 2 metrədək artırılıb. Yığım sexlərinin girişində dezinfeksiyaedici məhlullarla dolu qablar, qoruyucu maskalar, bir dəfə istifadə üçün əlcəklər qoyulub. Bundan başqa, aidiyyəti qurumların köməkliyi ilə sexlərimiz mütəmadi dezinfeksiya edilir” - deyə, - X.Fətiyev əlavə edib.
Müşahidə Şurası Sədrinin bildirdiyinə görə, hazırda zavodda müxtəlif modeldə traktorların və bir sıra kənd təsərrüfatı texnikalarının, o cümlədən müxtəlif modeldə və təyinatda traktorların yığımı aparılır:
“Bu gün orta hesabla 2-4 traktor yığımı həyata keçirilir ki, bu da adi iş rejimində olduğundan 50 faiz aşağıdır. Mart ayında orta hesabla 35 traktor yığılmışdır. Hazırda yetər sayda yığılmış müxtəlif modeldə traktor və kənd təsərrüfatı texnikaları var. Əgər tələbat olarsa, müraciət edən hər kəsin istəyinə uyğun texnika ilə təmin edə bilərik”.
Gələcək planlara toxunan Şura Sədri yaxın vaxtlarda "Gəncə Avtomobil Zavodu" İstehsalat Birliyi (İB) ilə Finlandiyanın məşhur "Sampo" firması ilə əməkdaşlıq müqaviləsi əsasında Sampo-Roselew markalı kombaynların yığımına başlanılacaq:
“Hazırda bu müqaviləyə uyğun olaraq komplektləşdiricilər gətirilir. Hissələr tam şəkildə müəssisədə olduqdan sonra kombaynların yığımına start verəcəyik. Gəncə Avtomobil Zavodunun kombayn yığımında artıq təcrübəsi var. Ümidvaram ki, tanınmış marka olan Sampo-Roselew kombaynları iş adamlarının və fermerlərin ürəyincə olacaq”.
Xanlar Fətiyev əlavə edib ki, ölkədə koronavirus epidemiyası ilə əlaqədar bir çox sahələrdə fəaliyyətin məhdudlaşdırılmasına baxmayaqraq kənd təsərrüfatında işlər davam etdiyindən Gəncə Avtomobil Zavodu İB-i fermerlər və iş adamları üçün bir sıra güzəştlər nəzərdə tutan paketlər üzərində iş aparır. Müəssisənin rəhbərliyi hesab edir ki, Gəncə avtomobil zavodu olaraq birlikdə güclü olan Azərbaycana bununla öz dəstəklərini göstərmiş olacaqlar.