Bakı. Trend:
Qida texnologiyaları üzrə beynəlxalq ekspert Upali Samarajeewa Azərbaycan Qida Təhlükəsizliyi İnstitutunun (AQTİ) nəzdində fəaliyyət göstərən laboratoriyaların mütəxəssisləri üçün “Metod validasiya və verifikasiyası” mövzusunda təlim keçib. Onlayn formatda keçirilən təlimdə Mərkəzi Baytarlıq Laboratoriyasının, Milli Referens Laboratoriyasının, Mərkəzi Fitosanitar Laboratoriyasının, Kompleks Tədqiqatlar Laboratoriyasının əməkdaşları ilə yanaşı, Bakı, Abşeron, Tovuz, Lənkəran və Göygöl Regional Sınaq laboratoriyalarının da mütəxəssisləri iştirak edib.
Beynəlxalq ekspert Upali Samarajeewa təlim iştirakçılarına bu beynəlxalq standartın tətbiqinin təmin edə biləcəyi fayda və üstünlüklərdən geniş bəhs edib. Həmçinin laboratoriyalarda istifadə olunan müxtəlif metodların validasiya və verifikasiyasını müqayisəli şəkildə izah edib. Təlimdə stabillik, dəqiqlik, doğruluq, düzgünlük, ölçmə qeyri-müəyyənliyi, LoQ, LoD, ölçmə aralığı, xəttilik, spesifiklik, seçicilik, paralelizm, geri qazanma kimi parametrlər üzrə nəzəri biliklər aşılanıb, mövzu üzrə interaktiv müzakirələr aparılıb. Sonda isə iştirakçıların təlimi necə mənimsədiyini müəyyən etmək məqsədilə qiymətləndirmə aparılıb.
Qeyd edək ki, “Metod validasiya və verifikasiyası” təlimi sınaq laboratoriyalarının göstərdiyi xidmətlərin keyfiyyətini artırmaq üçün nəzərdə tutulub. Təlimin məqsədi ISO/IEC 17025 standartının tələbinə uyğun olaraq metodun validasiya və verifikasiyasını həyata keçirmək üçün AQTİ mütəxəssislərinin peşəkarlıq və səriştəlilik səviyyəsinin yüksəldilməsi, bilik və bacarıqlarının artırılmasıdır.