Nyu-York Təbiətşünaslıq Muzeyində Azərbaycana həsr edilmiş sərgi açılacaq

2006-cı il ərzində Nyu-York Təbiətşünaslıq Muzeyində Azərbaycana həsr edilmiş bölmə yaradılacaq. Bu barədə Trend ə Xarici Ölkələrdə Yaşayan Azərbaycanlılarla İş üzrə Dövlət Komitəsindən məlumat verilib.

Qeyd edək ki, Nyu-Yorkun Təbiətşünaslıq Muzeyində dünyanın bütün xalqları haqqında məlumat guşəsi olduğu halda (erməni və gürcülərin tarixindən bəhs edən iki bölmə var) burada Azərbaycana həsr olunmuş bölmə olmayıb. Dövlət Komitəsi tərəfindən muzeyin rəhbərliyilə aparılan uzunmüddətli danışıqlardan və yazışmalardan sonra belə bir ümumi qərara gəlinib ki, ilkin mərhələdə Azərbaycanla bağlı müvəqqəti sərgi təşkil olunsun. Gələcəkdə isə həmin sərginin muzeydə daimi saxlanılması və genişləndirilməsinə qərar veriləcək. Nyu-Yorkda Amerika Təbiətşünaslıq Muzeyində Azərbaycan sərgisinin açılması ölkəmizin tarixi və mədəniyyəti haqqında məlumatların bütün dünya ictimaiyyətinə çatdırılmasında mühüm addım olacaq.

Azərbaycan bölməsinin açılışı üçün Dövlət Komitəsi bu məsələni Azərbaycan Respublikasının Mədəniyyət Nazirliyi və Azərbaycan Dövlət Tarixi Muzeyi ilə müzakirə edib və lazımı eksponatların alanıması üçün razılıq əldə olunub. Hazırda Dövlət Komitəsinin əməkdaşları müvəqqəti sərginin açılışı ilə bağlı texniki işləri yekunlaşdırmaq məqsədilə ABŞ-da ezamiyyətdədir.

Trend-in ən mühüm və maraqlı xəbərlərini "Telegram"da izləyin