Yanvarın 25-də keçmiş baş nazir Surət Hüseynovun sürücüsü İntiqam Babaxanov S.Hüseynovun dəstəsinin üzvü olmuş Elçin Babayevin Ağır Cinpayətlərə Dair İşlər üzrə hərbi Məhkəmədə keçirilən məhkəmə iclasında şahid qismində ifadə verib. Bu barədə Trend xəbər verir.
İ.Babayev ifadəsində göstərib ki, 1994-1995-ci illərdə Surət Hüseynovun rəhbərliyi ilə yaradılmış "Nicat" silaşlı birləşməsində iştirak etmiş Elçin Babayev silahlı birləşməyə onun vasitəsi ilə gəlib. Şahid silahlı birləşmə tərkibindəki fəaliyyətləri barədə məhkəməyə geniş məlumat verib.
Məhkəmədə ifadə verməkdən imtina edən təqsirləndirilən şəxs Elçin Babayev bunu ibtidai istintaqa verdiyi ifadəsini təsdiqləməsi ilə əlaqələndirib. Həmin ifadəsində isə E.Babayev silahlı birləşmə tərkibində iştirak etdiyini təsdiqləyib.
Elçin Babayev 1994-95-ci illərdə Surət Hüseynov tərəfindən şəhid ailələrinin müdafiəsi adı altında yaradılmış "Nicat" Komitəsinin silahlı qruplaşmalarında iştirak edib. 4 oktyabr 1994-cü il tarixdə dövlət çevrilişinə cəhddə iştirakda təqsirləndirilən E.Babayev 1995-ci ildə özündə olan odlu silahı polis orqanına könüllü şəkildə təhvil verib. Həmin il onun barəsində cinayət işi başlansa da, istintaqdan yayındığı üçün barəsində axtarış elan edilib. 4 oktyabr 2006-cı il tarixdə Gəncə şəhəri, Kəpəz rayon polis şöbəsinin əməkdaşları tərəfindən tutularaq istintaq orqanına təhvil verilib.
Məhkəmə iclasına hakim Məmmədbağır Zeynalov sədrlik edir.
