Azərbaycan, Bakı / Trend , müxbir, K. Zərbaliyeva/ Nizami rayonu Keşlə qəsəbəsində 201 saylı orta məktəbin 7-ci sinif şagirdi İlkin Hüseynlinin qətli ilə bağlı cinayət işinin istintaqı yekunlaşıb. Nizami Rayon Prokurorluğundan cümə axşamı Trend ə verilən məlumata görə, cinayət işinin materialları baxılması üçün Ağır Cinayətlərə Dair İşlər üzrə Məhkəməyə göndəriləcək.
Çoxsaylı kəsilmiş-deşilmiş xəsarətlər almış İlkin Hüseynli ölümcül vəziyyətdə dekabrın 9-da Keşlə qəsəbəsində "Savalan" mebel fabrikinin yaxınlığında tapılıb. 32 saylı xəstəxanaya çatdırılsa da, onun həyatını xilas etmək mümkün olmayıb. Nizami Rayon Prokurorluğunda Cinayət Məcəlləsinin 120.1-ci (qəsdən adamöldürmə) maddəsi ilə cinayət işi açılıb. 201 saylı orta məktəbin 9-cu sinif şagirdi Adil Dadaşov Hüseynlinin ölümündə təqsirli bilinir.
Keşlə qəsəbəsinin sakinləri bildiriblər ki, Hüseynli dərs vaxtı naməlum şəxs tərəfindən çölə çağırılıb. Sakinlər qətlin qisasçılıq zəmnində baş verdiyini iddia edir.