Azərbaycan, Bakı, 4 sentyabr /Trend/
Azərbaycan Respublikası Atçılıq Federasiyası polo üzrə Bakıda keçirilmiş I dünya kubokundakı böyük uğurundan sonra 5-7 sentyabr tarixlərində "Binə Atçılıq Mərkəzi"nin tamamilə yeni inşa olunmuş polo arenasında 2-ci tarixi yarışı təşkil edəcək.
Federasiyadan Trend-ə verilən məlumata görə, polo üzrə Bakıda keçiriləcək 2-ci dünya kubokunda Azərbaycanla yanaşı, Argentina, ABŞ və Avropa olmaq üzrə dörd peşəkar komanda iştirak edəcək.
Komandalar dünya şöhrətli "Chopard", "Maserati", "Baltika 7" və "Embawood" brendlərini, eləcə də digər sponsorlarını təmsil edəcəklər.
Azərbaycan Respublikası Atçılıq Federasiyasından bildirilib ki, ölkəmizin polo komandası tarixində ilk dəfə Buenos-Ayres şəhərində yerləşən "Alegria Polo Farm"-dan olan peşəkar məşqçilər tərəfindən təlim keçib və yarışa yüksək səviyyədə hazırlaşıb.
Bakıda keçiriləcək "Dünya kuboku - 2014" üçün Azərbaycan komandasını Raul Laplasette və onun məşqçilər heyəti, həmçinin Hamburq şəhərindən gəlmiş dünya şöhrətli polo müəllimi Tomas Vinter hazırlayıb.
5 sentyabrda yarışlardan sonra "Jumeirah Bilgah Beach Hotel"-də diskoteka, 6 sentyabrda dünyaca məşhur "İn-Grid" və "I Love İtaly" qruplarının konsert proqramı və 7 sentyabrda bağlanış tədbiri keçiriləcək. Biletləri şəhər kassalarından, "Kempinski Hotel Badamdar", "Khazar Golden Beach Hotel" və "Elite Horse and Polo Club"-dan əldə etmək mümkündür.