Azərbaycan, Bakı, 30 oktyabr /Trend/
Bakı Ali Neft Məktəbində (BANM) "Neftçi" Peşəkar Futbol Klubunun ("Neftçi" PFK) İcraçı direktoru Elnur Məmmədovun Ali Məktəbin futbol həvəskarı olan tələbələri ilə görüşü keçirilib.
BANM İctimaiyyətlə əlaqələr şöbəsindən Trend-ə verilən məlumaa görə, tədbiri giriş sözü ilə açan BANM rektoru Elmar Qasımov qonağı salamlayaraq, dəvəti qəbul etdiyi üçün ona tələbələrin adından təşəkkürünü bildirib. E.Qasımov futbolun müasir dövrdə dünya ictimaiyyətinin diqqət mərkəzində olan və insanların asudə vaxtının əsas hissəsini təşkil edən ən populyar idman növü olduğunu tədbir iştirakçılarının diqqətinə çatdırıb. O, Azərbaycan Respublikasının Prezidenti İlham Əliyev və SOCAR rəhbərliyi tərəfindən idmana, xüsusilə də futbola göstərilən qayğı nəticəsində son illərdə "Neftçi" PFK-nın fəaliyyətində böyük dönüşün göz qabağında olduğunu vurğulayıb.
E.Qasımov həmçinin, hal- hazırda "Neftçi" PFK-da yerli kadrlara üstünlük verilməsini yüksək qiymətləndirib. Rektor öz çıxışında uğurlu futbol oyununda azarkeş fan-klubunun böyük önəmi olduğunu vurğulayaraq, gələcəkdə BANM-in fəal Neftçi azarkeşlərinin "Neftçi" fan-klubuna üzv olmalarına müsbət fikir bildirib. O, BANM-in yeni kampusunda tikilən böyük idman stadionunun nəinki Ali Məktəbin futbol komandaları üçün, həmçinin Respublika futbol oyunlarının keçirilməsi üçün əlverişli olduğunu deyib. E.Qasımov Ali Məktəbin tək təhsil ocağı deyil, həm də gənclərin idman bacarıqlarının nümayişi üçün bir platforma olmasının vacibliyini vurğulayıb.
"Neftçi" PFK-nın İcraçı direktoru Elnur Məmmədov öz növbəsində ölkənin ən qabaqcıl ali təhsil ocağında qonaq olmaqdan və ölkənin intellektual gəncliyi ilə görüşməkdən məmnunluğunu ifadə edib. O, Ali Məktəbin gənc futbol həvəskarlarına "Neftçi" PFK-nın fəaliyyət istiqamətləri, hədəfləri, fan-klubu və dövlət tərəfindən futbola göstərilən qayğıdan söz açıb. E.Məmmədov "Neftçi"-nin qələbələrində böyük azarkeş dəstəyinin önəmli rol oynadığını qeyd edərək, bu kluba azarkeşlik edən tələbələri "Neftçi" fan-klubuna üzv olaraq futbol oyunlarına dəstək olmağa çağırıb.
Sonra futbol həvəskarları olan tələbələr öz təklif, sual və istəkləri ilə çıxış ediblər. Tələbələrin sualları "Neftçi" PFK-nın İcraçı direktoru tərəfindən cavablandırılaraq, onların təklifləri qeydə alınıb.
Sonda Ali Məktəbə və tələbələrə "Neftçi" klubunun simvolik hədiyyələri təqdim olunub.
