Bakı. Trend:
Keçən il Formula 1-də dünya çempionu titulunu qazanan Lyuis Hemilton 1 nömrəni seçmək hüququna malik olsa da, bundan yenə imtina edib.
Trend "F-1.az" saytına istinadən məlumat verir ki, britaniyalı sürücü üçüncü il ardıcıl olaraq 44 nömrə ilə yarışacaq.
2014-cü ildə çıxan qaydalara əsasən sürücülər 2-99 rəqəmlərindən birini seçərək, karyeraları boyu həmin nömrə ilə çıxış edirlər. Yalnız dünya çempionu titulunu qazanmış sürücü 1 nömrəni seçmək hüququna malikdir.
L.Hemilton 2014-cü ildə çempion olmasına baxmayaraq, 1 nömrəni seçməmişdi və 44 nömrəli maşında yarışmağa davam etmişdi.
Britaniyalı sürücü 2015-ci ildə də çempion oldu, amma o bu il yenə də 44 nömrə ilə yarışacaq.
31 yaşlı sürücü keçən il 44 nömrəni seçməsi ilə bağlı demişdi: "Mənim nömrəm 44-dür. Kartinqdə ilk çempionluğumu 44 nömrə ilə qazanmışam".
Qeyd edək ki, Jül Byanki dünyasını dəyişəndən sonra FIA ona məxsus olan 17 nömrəni seçimdən çıxarıb.