Bakı. Cani Babayeva - Trend:
Milli Gimnastika Arenasında hər keçirilən yarış yüksək zövq verir, burada tamaşaçılar şən olur, zal isə gözəldir.
Bunu Trend-ə bədii gimnastika üzrə 25-ci Azərbaycan çempionatı və Bakı birinciliyinin tamaşaçısı Tatyana Həsənova deyib.
"Mənim nəvəm artıq 4-cü ildir ki, bədii gimnastika ilə məşğul olur, biz bütün yarışlara baxmağa gəlirik. Həyəcan keçirdirik və yarışan idmançılara dəstək oluruq. Azərbaycanlı gimnastlara həmişə yüksək nəticələr arzulayıram" - tamaşaçı belə deyib.
Tatyana Həsənovanın sözlərinə görə, nəvəsi Türkiyə, Macarıstan, Polşada keçirilən yarışlara qatılıb, lakin ona Milli Gimnastika Arenasında yarışmaq xüsusi zövq verir:
"Hərdən o yaxşı çıxış edə bilmir, lakin Milli Gimnastika Arenasında keçirilən yarışlarda onda sanki ikinci nəfəs açılır".
Qeyd edək ki, bu gün Bakıda Milli Gimnastika Arenasında bədii gimnastika üzrə 25-ci Azərbaycan çempionatı və Bakı birinciliyinin ikinci günü start götürüb.
Bu gün 2006-2007, 2003-2005 və 2002-ci il təvəllüdlü gimnastların fərdi çıxışları baş tutacaq. Qaliblər çoxnövçülük xalına görə müəyyənləşəcək.
Yarışlarda Bakı Gimnastika Məktəbi, "Ocaq Sport" Klubu, "AyUlduz" Klubu, Sərhədçi İOM, Respublika Kompleks İdman Məktəbi, "Zirvə" İdman Klubu, o cümlədən Qusar və Gəncə şəhərlərini təmsil edən ümumilikdə 117 gimnast çıxış edəcək.
Üç gün boyunca davam edəcək turnirdə tamaşaçıların əyləncəli vaxt keçirməsi üçün maraqlı müsabiqələr və fleşmoblar da təşkil olunacaq.