Bakı. Cani Babayeva - Trend:
Azərbaycanda gimnastika sürətlə inkişaf edir.
Bunu Trend-ə bədii gimnastika üzrə 25-ci Azərbaycan çempionatı və Bakı birinciliyinin tamaşaçısı Səbinə Ramazanova deyib.
O, deyib: "Mənim qızım bədii gimnastika ilə məşğul olur, açıq-aşkar görünür ki, idmanın bu növü ildən-ilə inkişaf edir. Məşqçilər uşaqlarla dayanmadan çalışır".
S.Ramazanova bildirib ki, bədii gimnastikanı çox sevdiyi üçün qızını da məhz idmanın bu növünə yazdırıb:
"Bu, idmanın ən gözəl növüdür, burada hər şey var - incəsənət, lütf, hisslər, hər şey pozitivə doğru. Uşağa da bu, xoş gəlir".
Milli Gimnastika Arenasında keçirilən idman yarışları barədə tamaşaçı qeyd edib ki, təşkilatçılıq yüksək səviyyədədir, yarışlar maraqlı, şən və pozitiv keçir:
"Biz həmişə Milli Gimnastika Arenasına yüksək zövqlə gəlirik".
Qeyd edək ki, bu gün Bakıda Milli Gimnastika Arenasında bədii gimnastika üzrə 25-ci Azərbaycan çempionatı və Bakı birinciliyinin ikinci günü start götürüb.
Bu gün 2006-2007, 2003-2005 və 2002-ci il təvəllüdlü gimnastların fərdi çıxışları baş tutacaq. Qaliblər çoxnövçülük xalına görə müəyyənləşəcək.
Yarışlarda Bakı Gimnastika Məktəbi, "Ocaq Sport" Klubu, "AyUlduz" Klubu, Sərhədçi İOM, Respublika Kompleks İdman Məktəbi, "Zirvə" İdman Klubu, o cümlədən Qusar və Gəncə şəhərlərini təmsil edən ümumilikdə 117 gimnast çıxış edəcək.
Üç gün boyunca davam edəcək turnirdə tamaşaçıların əyləncəli vaxt keçirməsi üçün maraqlı müsabiqələr və fleşmoblar da təşkil olunacaq.