Bakı. Trend:
Orta Dəhliz həm türk dünyasına aid, həm də diplomatiyanı və nəqliyyat əlaqəliliyini təcəssüm etdirən, qlobal qeyri-müəyyənlik şəraitində sabitliyi möhkəmləndirən bir rəmz kimi qəbul edilməlidir.
Trend xəbər verir ki, bunu Qazaxıstan Prezidenti yanında Strateji Tədqiqatlar İnstitutunun direktoru Jandos Şaymardanov Bakıda keçirilən Türk Dövlətləri Təşkilatına (TDT) üzv ölkələrin beyin mərkəzləri konfransında bildirib.
Onun sözlərinə görə, Azərbaycan və Ermənistan arasında ABŞ-də paraflanmış sülh sazişi layihəsi tarixi bir dönüş nöqtəsidir və bütün türk dünyasının ortaq qələbəsi sayılır. Bu, infrastrukturun təkcə iqtisadi aktiv deyil, həm də sabitliyin və uzunmüddətli əməkdaşlığın siyasi təminatı olduğu bir mühit yaradır.
“Ümumiyyətlə, sərhədlər açıldıqda, prosedurlar harmonizasiya edildikdə, energetika, ticarət və insanların sərbəst hərəkəti təmin olunduqda, münaqişə üçün stimullar azalır, əməkdaşlıqdan əldə edilən faydalar isə artır. Məhz bu yolla coğrafiya sülhə çevrilir”, - deyə o qeyd edib.
Şaymardanov “yaşıl enerji" dəhlizi layihəsi (Qara dəniz vasitəsilə) və Azərbaycanla Qazaxıstan arasında çəkiləcək sualtı fiber-optik xətt də daxil olmaqla enerji və rəqəmsal təşəbbüslərin əhəmiyyətini vurğulayıb. Bildirib ki, onların birgə icrası elektrik enerjisi və məlumat axınını birləşdirən Xəzər–Qara dəniz “ikiqat dəhlizini” formalaşdıra bilər.